الايام الحلوه , ايام النفوس الصافية , ايام اللي جاره يأمن على جاره , ايام كانوا الكويتيين على قلب واحد الحضري والبدوي والشيعي كلهم يقولون هذه ارضنا وبس , ايام اللي تكون الكلمة اهي عقد بين الشاري والمشتري بدون اوراق , ايام البوشية اللي اتغطي الويه والستر بين الحريم ويكون الشباب اهم اللي يحمون بناتنا مو يأذونهم بالشوارع
السلام عليكم ورحمة الله وبركاته
اليوم يه على بالي اني اكتب عن الولاء , ادري ان الموضوع اخذ اكثر من حقه لكن بقوله بطريقتي الخاصة,
1- الولاء لما تكون عندي جنسية وحده مو اكثر من جنسية
2- الولاء لما اشوف الغلط و ما اسكت
3- الولاء اني ما ابيع ضميري وابوق من ديرتي حتى لو قلم اكتبه بالدوام وهالقلم تصرفه الوزارة
4- الولاء مو بالرش والتقحص لمدة يومين وبعدين ترد حليمة لعادتها القديمة
5- الولاء اني ادافع عن وطني بالعمل الصادق المخلص مو اداوم ادق الكرت وارد انام
6- الولاء اني احافظ على خيرات البلد مو اخربها واشخبط عليها ولا اكسرها
7- الولاء للوطن ثم للأمير وولي عهده مو حق ارهابي قاتل او حق حزب خارج بلدي
8- الولاء احافظ على قيم شعبي واحافظ على اخواني واخواتي من كل مكروه
9- الولاء بالدعاء لهذه الارض بأن يحفظها ربي من كل مكروه ويحفظ شعبها من كل انحراف غير صحيح
10 - الولاء اني احافظ على المال العام بالتطبيق وليس بالقول
11- الولاء اني ارفع اسم الكويت عالي بالعلم والانجازات في جميع الميادين
12- الولاء اني اتعب عشان هالارض وما ارتاح الا لما اشوفها تنبض في احلى صورة
13- الولاء مو بالصراخ الماصخ واللي ماله داعي على اي شيء يصير بالبلد
14- الولاء اني اكتب اللي يفيد ديرتي مو يشوه سمعتها من خلال المسلسلات الدايخة
15- الولاء لما اسمع نداء بلدي للحرب ادافع عنها بكل شيء من مال وبنون مو اول ما احس انها في خطر انحاش بره
16- الولاء لما يكون عندي خير من الله استثمره داخل ديرتي واساعد المحتاجين مو اخزن فلوسي بره الكويت او ارسل الفلوس الى البنوك الخارجية عشان اأمن مستقبلي
17- الولاء لما احافظ على ديرتي ولا احط ببالي انها مجرد دولة مؤقته وانها عباره عن كيكة لازم آكلها ولما تنتهي اروح عنها عقب ما شبعت
18- الولاء اني ما افرق بين طوائف ديرتي واسوي الفتنه بينهم عشان سمعة
19 - الولاء اني ما اعمم الغلط على فئة او طائفة اذا واحد منهم غلط او مجموعة منهم غلطت بحق ديرتي
20 - الولاء كلمة ليس لها تعريف قولي بل تعريف فعلي وعملي
21 - الولاء بتطبيق جميع القوانين على جميع الفئات بدون استثناء من كبيرهم لي صغيرهم
22-
23-
24-
ودي اكمل لكن ادري ما راح اخلص هذا اللي يه بخاطري , وعلى فكرة هذا شعور كل كويتي يحب هالارض بدون استثناء سواء كان حضري او بدوي او شيعي , وعلى قولة المثل الايد الوحده ما اتصفق
وآخر الكلام ............... ما اقول الا
اللهم احفظ هذا البلد آمنا مطمئنا من كل مكروه
اللهم اهدي نفوسنا بما تحب وترضى وابعد عنا الحسد والحقد وشر الفتن
اللهم احفظ اميرنا وولي عهدنا من كل مكروه , وابعد عنهم البطاااااااااااااااااانه الفاسدة , وسدد رأيهم لخير هذه الامة
اللهم الف بين قلوبنا وابعد عنا الرياء والنية الخاطئة
يا ذا الجلال والاكرام سبحانك اللهم وبحمدك لا اله الا انت توكلت عليك يا عزيز يا رحمن استغفرك واتوب اليك
ملاحظة : الكلام المكتوب تحت الصورة القديمة للكويت مو معناته ان الحين بهالوقت ماكو احترام او ماكو ستر او ان الاخلاق قبل احسن من الحين , لكن حبيت اقول ان النفوس تغيرت وان العادات الغربية السلبية طغت على سلوكياتنا , وياريت ناخذ من العادات الغربية الايجابية وانخلي النطيحة والمتردية لهم
لكم مني كل تحية واحترام
