اولويات !!!

السلام عليكم ورحمة الله وبركاته ..

اول شيء آسف اني طولت بكتابة موضوع يديد لكن مو بيدي هالشيء , وثانيا مبروك عليكم المطر بصراحة الجو عجيب وان شاء الله يكون هالجو على طول حتى لو بعد بالصيف :))

اليوم ان شاء الله راح نتكلم عن الاولويات , وهذه الاولويات تنقم الى 3 اقسام

* اولويات حكومات

* اولويات وزارات وهيئات وشركات

* اولويات الافراد

اليوم فقط راح نتلكم عن اولويات الافراد لانها بنظري مهمة جدا للفرد والمجتمع واللي هو اساس الدولة

احيانا كثيرة تشوف الواحد مو عارف شنو يبي بالضبط مو عارف شنو اولوياته بحياته , تلقاه يبي يشتري سيارة يديدة مع العلم ان اهوه عنده سيارة وحالتها انقول ممتازة وتلقاه بنفس الوقت يبي يسافر يكلم دراسته بره الديرة وبنفس الوقت تلقاه يبي يدش البوصة وماخذ قرض وحالته حاله

هالشخص هذا فيه منه وايد تلقاه مو عارف وين طريقه مو عارف شنو هدفه !

وعشان الكل يستفيد اشلون يضبط اموره فا راح انقوله هالنقاط اللي علماء النفس والاجتماع قسموها الى 4 اقسام , فنقول ان الاولويات هي :

1- اولويات ضرورية ومهمة

2- اولويات ضرورية لكنها غير مهمة

3- اولويات غير ضرورية لكنها مهمة

4- اولويات غير ضرورية وغير مهمة

وتختلف هذه التقسيمات من شخص لآخر على حسب نشأته وعلى حسب بيئته وعلى حسب تخطيطه

ونأخذ مثال على كل قسم , وهو القسم الاول ( اولويات ضرورية ومهمه ) وتعريفها :

هي الاوليات التي يكون لها اثر واضح على الانسان فإن لم يفعلها او يعملها فسوف يؤدي ذلك تعطل المصالح الشخصية والحياتية

والمثال على ذلك نقول مثلا :

توصيل الابناء الى المدارس خصوصا اذا لم يوجد سائق , الصلاة بوقتها وعدم التهاون فيها , شراء احتياجات البيت من الجمعية , بر الوالدين , ان يخطط الانسان لحياته ويجعل لذلك هدف

طبعا الامثلة اللي ذكرتها مو شرط تكون مطابقة للاولوية لان مثل ما قلت كل واحد اهوه اللي يحدد هل هذا مهم او غير مهم

اما القسم الثاني وهو ضروري لكنه غير مهم فهوه :

ان هذه الاولوية مهمه للانسان لكن اذا اجلها لفترة من الزمن ما راح اتضره , مثل :

واحد خلص الجامعة ويبي يشتغل , وبينه وبين نفسه يبي يكمل دراسته لكن شاف ان الوظيفه اهم من تكملة الدراسه وقال اتوظف وبعدين اكمل لان الدراسه عنده شيء اساسي

ومثال آخر واحد عنده سيارة تعتبر جيدة جدا مافيها شيء لكن يبي سيارة جديدة , قال بينه وبين نفسه استعمل السيارة اللي عندي لما احس انها خلاص مافيها حيل ذيج الساعة آخذلي وحده جديدة

اما القسم الثالث وهو غير ضروري لكنه مهم وهو :

ان تكون الاولوية غير ضرورية لكنها تؤثر على مصالحه

والمثال على ذلك : تلفون السيارة او الموبايل عند البعض غير ضروري وتلقاه كله ناسيه بالمكتب ولا بالسيارة لكن ما يدري ان هالشيء ضروري له وحق اهله وحق اصدقاءه و من خلاله يقدر يعرف شاللي قاعد يصير بالديرة او يمكن يحتاج الموبايل اذا تعطلت سيارته

اما القسم الرابع الاولويات الغير مهمة والغير ضرورية

فهي اولويات سواء عملتها ام لم تعملها فهي لا تؤثر على سير حياتك ونقدر انقول عنها انها مثل الكماليات

ومثاله ايضا معروف للكل :

يعني شخص عنده خير من الله مو عارف شنو يسوي , ركب ليتات زينون على سيارته !!!!

واحد ماعنده شغل ولا مشغله راح اشترى عشاء مع العلم انه مو يوعان :))))

هذا الموضوع بصراحة استفدت منه وايد في حياتي خلاني اعرف شنو ابي بالضبط ومتى اقدر اسوي اللي ابيه سواء كان شراء او صلة الرحم او الدراسه , واعرف وقت الازمات كيف اتصرف واتخذ القرار الصحيح

الامثلة اللي قلتها ارد واقول ليست كلها تطابق اقسام الاوليات بل نكرر انها تعتمد على الشخص , ماذا يريد ؟ وتعتمد على الظروف المحيطة به , هو الذي يقرر بنفسه كيف يعيش وسط كل هذه المغريات سواء مغريات الدنيا او الآخرة

ولكم مني كل تحية واحترام

وزراة ولكن !

السلام عليكم ورحمة الله وبركاته

اليوم راح نتكلم عن وزارة الصحة واللي اهيه طبعا من اهم الوزارات الموجوده عندنا
بصراحة اتحسف لما اشوف التدهور الصحي في المستشفيات سواء كان طبيا او اداريا او انسانيا

على المستوى الطبي فهو بلا حرج من سيء الى اسوأ , يعني واحد ظهره يعوره على طول يعطيه الدكتور دوا و ابره بدون ما يسويله اي نوع من انواع الاشعه الموجودة , سبحان الله الدكتور قام يشوف مكان الالم بدون اشعه , ايضا لما الواحد يروح حق الدكتور ويشتكي من الم في راسه طبعا الدواء على طوووووووول بـــــــــــــــنـــــــــــــدول , لما يفحص الشخص اللي يايله بالشكل المفروض , ولما اييله الشخص مره ثانية ويشتكي من نفس الالم تلقاه هم بعد بندول , يعني انا بعرف مالك خلق اتسويله تحاليل ولا اشعه حق راسه ؟ !!
هذا طبعا غير التشخيص اللي اعتقد انه 60% خطأ , يا معطين ابره بالغلط ولا دوا بالغلط للأسف صرنا محط تجارب للدكاترة
وطبعا فيه بلاوي وااايدة لكن نتأمل ان هالوضع يتعدل للأحسن , والمثل يقول الحق الجذاب ( الكذاب ) لي باب بيته بنشوف !!!!!!


على المستوى الاداري فحدث ولا حرج تخبط ما بعده تخبط , وخصوصا المواعييييييييييد اخييييه اهيه اللي اتيييب العوار اكثر من المرض نفسه , سواء مواعيد الاسنان ولا العيون ولا الاشعة المقطعية ولا الجلدية
قبل جم يوم امودي بنتي حق طبيب العيون ولا يقولون لازم تاخذ تحويل , قلنا مو مشكلة خذينا تحويل ولا اتقول الطبيبه لازم تاخذ موعد هم قلنا مو مشلكة رحت باخذ الموعد ولا اتقولي الكاتبة اخوي تره موعدك بعد شهر و 10 ايام ؟؟؟؟؟؟؟؟؟؟ !!!!!!!!!!!!!!
يعني طفلة عيونها فيها الم وحالتها حاله اتقولي تعال بعد شهر ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ لكن الحمدالله بعد ما كلمت الدكتور عطاني موعد بعد يومين وعدت على خير

ووايد ناس اعرفهم اذا يبون ياخذون موعد يتبهدلون ويضطرون انهم يروحون الى العيادات الخاصة او المستشفيات الخاصة , يعني بالله واحد يبي يسوي اشعة مقطعية يعطونه موعد بعد شهرين او 3 اشهر ؟؟؟؟ بالله هذه سالفة 3 اشهر عشان اشعة , بالاخير يروح الشخص الى مستشفى خاص ويدفع اكثر من 140 دينار عشان هذه الاشعة

وايضا على المستوى الاداري نلاحظ ضياع او اهمال ملفات المرضى وضياع بعض الاوراق داخل الملف نتيجة سوء التخزين و عدم حفظ هذه الملفات في اماكن جيدة , ولا ملفات المرضى ينحفظون بأماكن شبه مهجورة بمباني داثرة
ما ادري لي متى واحنا ما نستخدم التطبيقات الحديثه في حفظ البيانات والملفات في الكمبيوتر بدل هالملفات اللي انتهى عصرها


اما على المستوى الانساني فا اعتقد وهذا رأيي الخاص ان المستشفيات والعيادات الخاصة تفوقت على مستشفيات والعيادات والمراكز الحكومية في هذا الشيء , كفاية لما تدش عالدكتور واتشوفه يهتم فيك ويفحصك بشكل صحيح والابتسامة عليه واتحس انه مهتم بمرضك ويرد عليك بدون ملل هذا فيه 50% من العلاج , لان الراحة النفسية للمريض شيء مهم له , عكس لما تدش على الطبيب في القطاع الحكومي تلقاه ماله خلق يبي يخلص بسرعة عشان الزحمة اللي وراه , ما تلقاه الا كل اشويه طالع وتنطر لين ايي وايضا الدور مو طبيعي يعني عادي تدش المستشفى وتلقه الزحمة ولا بس اللي موجود دكتورين فقط

يمكن اتقولون ان القطاع الخاص افضل لانك تدفع لهم مقابل وفلوس بعكس الحكومي اللي بالمجان , ارد واقول ان الحكومي عنده امكانيات كبيييره اكبر من القطاع الخاص بوزارة الصحة وعلى هذا ما تقدر اتسوي ربع ما يسويه القطاع الخاص ليش مادري ؟
عندكم كل خير و ما تقدرون او ما اتعرفون اشلون تتصرفون في هذه الامكاانيات اهنيه اتصير المشكلة

القاعدة تقول : امكانيات مالية كبيرة و امكانيات طبية اكير + ادارة صحيحة = خدمات صحية راقية

اما القاعدة اللي موجودة عندنا بوزارة الصحة هي : امكانيات مالية كبيرة + فشل اداري بحت = وضع البلد على المستوى الصحي

ملاحظة : يمكن اللي قلته فيه بعض تجني على الاطباء لان اقول ان الخير يخص والشر يعم لان الشين ريحته واضحه واتعكر عكس الحلوه اللي اتخلي الواحد يرتاح ومايقول عنه شيء , وفيه شيء ثاني ادري ان فيه بعض الدكاتره فيهم الخير في القطاع الحكومي لكني اشوفهم ان اهم مو ماخذين حقهم بالوزارة فا تلقاهم بعد فتره من القهر وعدم تقديرهم يروحون حق المستشفيات الخاصة


لكم مني كل تحية واحترام

هذه مشكلتنا !!

السلام عليكم ورحمة الله وبركاته

اول شيء كل عام وانتم بخير والكويت بخير يا رب العالمين

اللهم احفظ الكويت من كل شر وبارك في شعبها واحفظه يا رب من الفتن , واحفظ أميرها واجعل له البطانه الصاااااااااااالحة بكل شيء خير

الحين ندخل في الموضوع , الموضوع اللي راح نتكلم فيه اليوم وايد مزعجني وكله على بالي اكتب وما يكون عندي وقت ,

انشوف كل يوم مشاكل بالديرة سواء كانت هالمشاكل اقتصادية او سياسية او اجتماعية او دينية

شنو سببها هل هي الحكومة ؟؟؟ هل هي من مجلس الامة ؟؟؟؟ هل من التجار ؟؟؟؟؟ هل هي من التكتلات النيابية ؟؟؟؟؟؟

برأيي ان كل هالمشاكل والبلاوي سببها هو المواطن نفسه !!

نعم احنا السبب تدرون ليش ؟؟ لان المواطن هو الوزير , المواطن هو النائب , المواطن هو التاجر , المواطن هو الناخب و و و و و ..... ومارح انخلص


قال الله تعالى في محكم تنزيلة : بسم الله الرحمن الرحيم (( إن الله لا يغير ما بقوم حتى يغيروا ما بأنفسهم)) صدق الله العظيم


تبون التغير للبلد ؟ تبون الخير للبلد ؟؟ تبون التطور الصحيح للبلد ؟؟؟؟

لازم انغير من انفسنا نحن , لما نلقى رئيس الوزراء يضع الرجل المناسب في المكان المناسب و يتم محاسبته على اداؤه و تقصيره باستمرار سوف نرى حكومة قوية متماسكة لان الرقابة تكمن من الاعلى

لما نلقى الوزير يخاف الله في كل اموره ويضع مصلحة الدولة والشعب امامه ويحاسب الوكلاء والمدراء على طول راح نلقى ان الوزارة نتنهج نهج واضح في سياستها

لما نلقى المدير العادي او مدير الادارة ماسك ادارته صح , وانشوفه بين الموظفين يشجعهم ويكون القدوة لهم ويعدل بين الموظفين بالترقيات ونلقاه يساعد الكبير قبل الصغير راح نلقا الوزارة بطريقة عمل الموظفين وتعاملهم للمراجع تكون من انجح الوزارات

لما انشوف ان نائب مجلس الامة يهتم بأمور تهم البلد وتهم المواطنين ولا ينشغل بأمور تااااافهه اتعطل البلد راح نلقى برلمان محترم
ولما نلقا النائب يتكلم كلام سيء جدا حتى الياهل الصغير ما يقوله بالمدرسة ويحط مصلحتة الشخصية او مصلحة قبيلته او مصلحة تكتله او مصلحة عائلته او مصلحة طااااااائفته عن مصلحة البلد هذا المفروض ان الناخبين اهم اللي يوقفونه عند حدة لان مكانه حساس ولا يحتمل انقول والله ان سلوكه جذيه شنو انسويله ؟؟؟؟؟

لما انشوف المواطن العادي و الموظف العادي ما يداومون بدواماتهم بكل القطاعات سواء حكومي او اهلي او نفطي او شركات خاصة
وكله مرضيات , ولما انشوف الموظف ياخذ الرشوه ويقبل الواسطه عيني عينك بدون احترام للمراجع اللي جدامه اهنيه المشكلة
لما نلقا المواطن ينتخب النائب بسبب عائلته او بسبب انتماءه الطبقي او الطائفي او القبلي ويختار النائب اللي ما يستاهل ولا عنده الكفاءة على حساب وطنه اهنيه نلقا المشكلة

لما اشوف المواطن نفسه ما يطبق القانون واللي انوجد للكل بدون تمييز ويتوسط للجاني اهنيه المشكلة
لما اشوف التاجر يزيد الاسعار بشكل جنوني على المستهلكين وما يهمه غير بيزاته وبس اهنيه المشكلة

لما اشوف التفرقة العنصرية بين ابناء الشعب نفسهم , كل واحد امسوي نفسه اهو الصح سواء من حضر ولا من بدو و لا من الشيعة , القى بينهم التناحر بكل مكان , الحضري يقول اهو الاساس والبدوي يقول احنا الاصل والشيعي يقول احنا اللي دائما مضهدون ولازم انكون المسيطرين على الاماكن الحيوية ؟؟؟؟؟
شالسالفة ؟؟؟؟؟ اشفينا ؟؟؟؟ يا حلو ابهاتنا قبل ويا حلو شيابنا لما تقعد بينهم ما تشم ريحة العنصرية بينهم تلقاهم على سجيتهم ولما تسمع قصصهم ما تسمع هذا سني ولا هذا بدوي ولا هذا شيعي كانوا ايد وحدة كلهم لان كان هدفهم هذه الاراض انها ما تنمحي من الخريطة كانوا خايفين على شعبها , التاجر يساعد الفقير والسني مع الشيعي في البحر والبدوي كان اييب التمر و الماشية للديرة ولا احد يتكلم عنه كانوا متكاتفين اللي يجمعهم حب هذا البلد والعيش بسلام عرفتوا ليش دائما انقول ان قبل احسن مع العلم ان قبل كنا افقر من الحين وما صار اللي قاعد يصير الحين .
الحين الكل قاعد يشوف ان الكويت عبارة عن كيكة واشلون يقدر ياكل منها كثر ما يقدر ولما يشبع او يشوف هالكيكة خلصت خلاها وراح مكان ثاني
هالكلام موجه للكل بدون تفرقة بين طوائف الشعب
تكفون يا جماعة الخير بسنا مهاترات بسنا عنصرية بجميع انواعها ملينا خلالالالاص , خل لما انداوم انحاول انا ما نغيب خلونا نبتسم للمراجع خلونا انطبق القانون بدون واسطه ولا رشاوي ,
لي نصيحة اول شيء ابيدها على انا وعلى باقي الشعب : خل عينك دائما مصلحة البلد ولا تنسى ان عليك رقيب وعتيد على يمينك وعلى شمالك يكتبون كل شيء انت اتسويه واتقوله , خاف الله وحط ببالك ان فيه آخره مو بس عايش فقط في هالدنيا

اليوم قاعدين انا ويه اخوي الكبير نتناقش في امور الديرة جان اقوله تصدق يابومحمد انا مستغرب من شغله , على ايام امير المؤمنين عمر بن عبدالعزيز فاضت خزانة الدولة او بيت مال المسلمين من الفوائض مع العلم ان عمر بن عبدالعزيز كان يحكم الدولة الاسلامية بكبرها وتعدد انماط الشعب وكثر عدد سكان هذه الدول يعني تخيل ان وقتها كانت الدولة الاسلامية من مشرقها عند كازخستان وسمر قند الى المغرب العربي , كل هذا والخزانه فاضت بسبب عدم وجود فقراء ؟
قال امير المؤمنين لأمين بيت المال عندما علم بالفائض وزع هذا المال للمعسرين وبعد ايام اتى هذا الامين وقال وزعنا للمعسرين وبقي ايضا مال , وقال الامير وزع الباقي للمدينين وبعد عدة ايام اتى الامين وقال لقد وزعنا للمدينين وبقي من المال ايضا ثم قال الامير للامين زوج ابناء المسلمين الذين لا يستطيعون الزواج وهكذا .
للعلم فقط ان مدة حكم عمر بن عبدالعزيز للدولة الاسلامية هي سنتين فقط !!!!! ارأيتم عندما يقام العدل في اي بلد كيف تكون هذه النتيجة !!!!!!!!

المثال السابق لعمر بن عبدالعزيز ليس معناته ان انوزع الفلوس على المواطنين وانخلي الديرة في ازمات ولا اقصد ان انطيح الاقساط والقروض عن المواطنين لان الحال مختلف تماما ولاني ضد فكرة اسقاط الديون
ولكن انا ذكرت هذا المثال لمعرفة كيفية ادارة الدولة وتطبيق القانون بشتى انواعه على الكل و من ثم ان الناتج بالآخر يكون في مصلحة الفرد والمجتمع

كلامي هذا ليس المقصود بفئة معينه بل شامل كل افراد المجتمع


ولكم مني كل تحية واحترام