2008-01-14

وزراة ولكن !



السلام عليكم ورحمة الله وبركاته



اليوم راح نتكلم عن وزارة الصحة واللي اهيه طبعا من اهم الوزارات الموجوده عندنا
بصراحة اتحسف لما اشوف التدهور الصحي في المستشفيات سواء كان طبيا او اداريا او انسانيا

على المستوى الطبي فهو بلا حرج من سيء الى اسوأ , يعني واحد ظهره يعوره على طول يعطيه الدكتور دوا و ابره بدون ما يسويله اي نوع من انواع الاشعه الموجودة , سبحان الله الدكتور قام يشوف مكان الالم بدون اشعه , ايضا لما الواحد يروح حق الدكتور ويشتكي من الم في راسه طبعا الدواء على طوووووووول بـــــــــــــــنـــــــــــــدول , لما يفحص الشخص اللي يايله بالشكل المفروض , ولما اييله الشخص مره ثانية ويشتكي من نفس الالم تلقاه هم بعد بندول , يعني انا بعرف مالك خلق اتسويله تحاليل ولا اشعه حق راسه ؟ !!
هذا طبعا غير التشخيص اللي اعتقد انه 60% خطأ , يا معطين ابره بالغلط ولا دوا بالغلط للأسف صرنا محط تجارب للدكاترة
وطبعا فيه بلاوي وااايدة لكن نتأمل ان هالوضع يتعدل للأحسن , والمثل يقول الحق الجذاب ( الكذاب ) لي باب بيته بنشوف !!!!!!


على المستوى الاداري فحدث ولا حرج تخبط ما بعده تخبط , وخصوصا المواعييييييييييد اخييييه اهيه اللي اتيييب العوار اكثر من المرض نفسه , سواء مواعيد الاسنان ولا العيون ولا الاشعة المقطعية ولا الجلدية
قبل جم يوم امودي بنتي حق طبيب العيون ولا يقولون لازم تاخذ تحويل , قلنا مو مشكلة خذينا تحويل ولا اتقول الطبيبه لازم تاخذ موعد هم قلنا مو مشلكة رحت باخذ الموعد ولا اتقولي الكاتبة اخوي تره موعدك بعد شهر و 10 ايام ؟؟؟؟؟؟؟؟؟؟ !!!!!!!!!!!!!!
يعني طفلة عيونها فيها الم وحالتها حاله اتقولي تعال بعد شهر ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ لكن الحمدالله بعد ما كلمت الدكتور عطاني موعد بعد يومين وعدت على خير

ووايد ناس اعرفهم اذا يبون ياخذون موعد يتبهدلون ويضطرون انهم يروحون الى العيادات الخاصة او المستشفيات الخاصة , يعني بالله واحد يبي يسوي اشعة مقطعية يعطونه موعد بعد شهرين او 3 اشهر ؟؟؟؟ بالله هذه سالفة 3 اشهر عشان اشعة , بالاخير يروح الشخص الى مستشفى خاص ويدفع اكثر من 140 دينار عشان هذه الاشعة

وايضا على المستوى الاداري نلاحظ ضياع او اهمال ملفات المرضى وضياع بعض الاوراق داخل الملف نتيجة سوء التخزين و عدم حفظ هذه الملفات في اماكن جيدة , ولا ملفات المرضى ينحفظون بأماكن شبه مهجورة بمباني داثرة
ما ادري لي متى واحنا ما نستخدم التطبيقات الحديثه في حفظ البيانات والملفات في الكمبيوتر بدل هالملفات اللي انتهى عصرها


اما على المستوى الانساني فا اعتقد وهذا رأيي الخاص ان المستشفيات والعيادات الخاصة تفوقت على مستشفيات والعيادات والمراكز الحكومية في هذا الشيء , كفاية لما تدش عالدكتور واتشوفه يهتم فيك ويفحصك بشكل صحيح والابتسامة عليه واتحس انه مهتم بمرضك ويرد عليك بدون ملل هذا فيه 50% من العلاج , لان الراحة النفسية للمريض شيء مهم له , عكس لما تدش على الطبيب في القطاع الحكومي تلقاه ماله خلق يبي يخلص بسرعة عشان الزحمة اللي وراه , ما تلقاه الا كل اشويه طالع وتنطر لين ايي وايضا الدور مو طبيعي يعني عادي تدش المستشفى وتلقه الزحمة ولا بس اللي موجود دكتورين فقط

يمكن اتقولون ان القطاع الخاص افضل لانك تدفع لهم مقابل وفلوس بعكس الحكومي اللي بالمجان , ارد واقول ان الحكومي عنده امكانيات كبيييره اكبر من القطاع الخاص بوزارة الصحة وعلى هذا ما تقدر اتسوي ربع ما يسويه القطاع الخاص ليش مادري ؟
عندكم كل خير و ما تقدرون او ما اتعرفون اشلون تتصرفون في هذه الامكاانيات اهنيه اتصير المشكلة


القاعدة تقول : امكانيات مالية كبيرة و امكانيات طبية اكير + ادارة صحيحة = خدمات صحية راقية


اما القاعدة اللي موجودة عندنا بوزارة الصحة هي : امكانيات مالية كبيرة + فشل اداري بحت = وضع البلد على المستوى الصحي



ملاحظة : يمكن اللي قلته فيه بعض تجني على الاطباء لان اقول ان الخير يخص والشر يعم لان الشين ريحته واضحه واتعكر عكس الحلوه اللي اتخلي الواحد يرتاح ومايقول عنه شيء , وفيه شيء ثاني ادري ان فيه بعض الدكاتره فيهم الخير في القطاع الحكومي لكني اشوفهم ان اهم مو ماخذين حقهم بالوزارة فا تلقاهم بعد فتره من القهر وعدم تقديرهم يروحون حق المستشفيات الخاصة


لكم مني كل تحية واحترام

36 comments:

فتى الجبل said...

وزارة الصحة ما راح تتعدل الا اذامسكوها اداريين سنع
ولا تزعل ياخوي على موضوعي عن الاخوان ترى آنا قصدت انتقاد فكر الجماعة مو الأشخاص

someone_q8 said...

فتى الجبل
ما شالله عليك توني امسوي التعديل للبوست ولا اشوف تعليقك :)
مشكور وايد على هالتعليق السريع اللي صدمني :)

وكلامك عدل مشكلتنا اهنيه بالبلد ككل اهيه الادراة بحد ذاتها
وبعدين بالنسبة لموضوعك ياخوي صدقني انا ما زعلت لان هذا رأيك ولك كل الحرية في ابداء رأيك لكن ما احب التشبيه لأي حركة او تكتل او فكر معين بأي من الحيوانات والمثل يقول الاختلاف بالرأي لا يفسد للود قضية
عزيز وغالي ياخوي وحياك الله بأي وقت

Mohammad Al-Yousifi said...

من أكثر أخطاءنا الفكرية هي أننا دايما نقول في فلوس بس المستوى تعبان

الفلوس وسيلة حالها حال السيارة و غيرها من الوسائل

التطور اللي كلنا نبيه يحتاج عقول ادارية متطورة و ليس فلوس , و عندما نأتي الى العقول فشوف أكبر عقل بالوزارة منو؟ وزير علاقته بالطب مثل علاقتي بالحداق

انزين نقول يمكن الجهاز اللي تحته ممتاز

كلهم شياب و ما اعتقد احد فيهم جدد أو تعب على قدراته الادارية و فكر ان يطور

مشكلتنا من فوق يا عزيزي



و الا شنو المانع من أن يكون أخذ موعد مع الطبيب بالانترنت؟ تسوي موعدك بالساعة و الدقيقة و تروح هناك سيدة تدش على الدكتور

بالنسبة للأطباء فاللي أسمعه ان الدكاترة عندنا صكوا على الحلاقين , يعني الحلاق يحلق حق خمسة بالساعة أو سته اذا كان فلته , أما الأطبة فيعالج 20 بالساعة , وين يمديه يفحص

مشكور قلبي على مقالتك الجميلة

فريج سعود said...

احنا عندنا صيدليات مو مستشفيات
مرةكان الحلاق الباكستاني يشتكيلي من عوار راسه قلت له رحت الطبيب
قال بابا ليش يروح يدفع دينارين علشان باندول
انا يشتري باندول من جمعية بنص دينار

someone_q8 said...

kila ma6goog
يا حيالله اخوي بوسلمى زارتنا البركة
والله كلامك عدل
لكن لما نتكلم عن الفلوس احنا نتكلم عن حكومة لها القدرة انها تدعم وزارة الصحة وللأسف ان مافيه ادارة قوية ونشطة تعمل على رقي الخدمات الصحية واللي عافسنا هالبوق والمحسوبية وكل واحد يشتغل بروحه ما عندنا روح الفريق الواحد بالنسبة للادارة

ولا ننسى مثل ما قلت ما عندنا مفهوم الرجل المناسب في المكان المناسب والخراب من الكل واولهم من فوق
سعدت بتواجدك اخوي بوسلمى

someone_q8 said...

فريج سعود
لوووول
والله هالحلاق حكيم وزين يسوي مدام عارف القمندة
فعلا فيه وايد ناس ماتروح الطبيب وتلقاه على طول يروح الصيدلية

الله يعينا على هالوزارة ولا فجأة خلال ال 3 او 4 سنوات الماضية يفتح المجال للعلاج بالخارج بشكل مو طبيعي , والاسباب الكل عارفها
مشكور ياخوي على تعليقك وحياك الله

حياتي هدف مو عبث said...
This comment has been removed by the author.
حياتي هدف مو عبث said...

أختي تراجع في مستشفى مبارك

منذ قتره وعندما طلبت الدكتورة ملفها

تبين إن عندها 6 ملفات

بالضبط 6

شنو هالمستشفى ما أدري

..

الوزرات بلى إسثتناء

ممكن تتعدل إذا فُعلت القوانين

وكل واحد خاف ربه

شكراً لك أخووي

Selezya said...

سوء تدني بهالوزاره بشكل مو طبيعي

حتى الخاص صاير الله بالخير

الحين تبي علاج صج روح بره وتعالج والله لو اقول قصتي تصير بوست كامل لا من مستشفيات حكومة ولا من خاصه ولا حتى من عيادات خارجية

سلامة بنتك عساها مااتشوف الشر يارب :) توني ادري ان عندك بنوته الله يخليها لك ولا يحرمها منك

bo rashed said...

تصدق يا خوي احنا بالكويت صرنا اردى من اخوانا المصريين ما عندنا غير الحجي والانتقاد قبل كنا نفعل بعدين نتكلم وبعدها بفترة صرنا نتكلم وبعدين نفعل واليوم انتكلم من غير فعل يا خوفي لا ايينا يوم نتكلم بعكس افعالنا ولا تاخذ على خاطرك مني بس انا اللي بقلبي على لساني والله يجزيك خير على هالجهد الطيب
وعلى فكرة مدونتك وايد هادفة الله يعطيك على قد نيتك انشالله

تحياتي

darkness said...

صبحك الله بالخير

ما تشوف شر بنيتك و ما جوره باذن الله

و ان شاء الله تبشرنا قريب بسلامتها

:)


وزارة الصحه من اكثر الوزارات اللي فيها بوق

و هذا الشي اللي يبونه و من ييهم احد يبي يعدل يدورون عيله الزله عشان يشيلونه

يعني انا لازلت ارى ان د. الجار الله من احسن الناس اللي امسكت الوزاره

و للعلم انا لا اعرفه و لا تربطني فيه اي صله

بس هذا رايي

شوف شنو سوو فيه؟؟

مقوله لامي العوده و امي ايضا الله يخليهم لي و يرزقهم الصحه و العافيه

دايما يرددون

يا رب من حيلي لقبيري

و بصراحه ما الومهم

لان اهني الاطبه يلعبون بروي او حل اللغز بالتشيير

الله لا يعوزنا لهم

و يا رب يرزقنا الصحه و العافيه

J Daily said...

من رأيي الشخصي
الحكومة تخلي المستوصفات حكومية بس
وماكو شي اسمه مستشفى حكومي

المستشفيات كلها خاصه
ويصير تأمين طبي للمواطن او المقيم مع الوظيفه


طبعاً تامين الموظف يتبع عياله وزوجته


والمستشفيات الحكومية الخمسه يخصخصون اربعه ويخلون مبارك الكبير للي ماعنده تامين يطحس مناك (:

Peace said...

في مقوله عن المستشفيات بالكويت تقول
الداخل مفقود و الخارج مولود

و الله المستعان

someone_q8 said...

حياتي هدف مو عبث

مستشفى مبارك يبيله مستشفى مخصوص حقه عشان يعالجه

واللي يخافون ربهم الله اعلم بهم
لكن ينقصنا الذمة في العمل

someone_q8 said...

Selezya
الشر ما ييج اختي
ومشكورة على دعائج

وعلى الاقل المستشفيات الخاصه يهتمون بالمريض ويسوون له الاجراءات المطلوبه مو ربعنا موعد عشان اشعة ولا انطر وينادوني بالميكروفون عشان آخذ الدواء من الصيدلية
لكن شنو انسوي ماكو الا الدعاء :)

someone_q8 said...

bo rashed
يا حيالله اخوي بوراشد
المدونه وصاحب المدونه تحت امرك ولا آخذ بخاطري ولا شيء انت ما قلت شيء غلط
كلامك عدل لان من كثر ما ملت الناس من الكلام صار عندها الانتقاد اهو المتنفس لها من كثر ما يشوفون ويسمعون من سوء الادارة اللي حاصل بالبلد
والله يعطيك العافية تشرفنا بمرورك عزيز وغالي

someone_q8 said...

darkness
مشكورة اختي على تعليقك الطيب
الحمدالله البنت بخير بفضل الله

وبالنسبة للبوق , محد امخسبق الديرة الا هالبوق تدرين ليش ؟ لان عبالهم ان الكويت دولة مؤقته ولازم ياخذون منها كثر ما يقدرون قبل لا تروح راحت روحهم

د. الجارالله والنعم فيه ورأيي انا فيه انه افضل واحد مسك الوزارة اهوه واللي لازم انعرفه ان اهوه ولد الوزارة وعارف خباريها لكن ما يمنع ان الانسان يخطأ ولكن ماكو فايده الزين ينشال والشين موجود
لكي مني كل تحية

someone_q8 said...

يعقووبوو
لووووووول اهيه مو واقفه على مستشفى مبارك قول الوزارة بكبرها

اقتراح حلو لكن هل هو قابل للتطبيق عمليا ؟؟؟؟ لان من الناحية النظرية حلو

وبعدين وينك مو امبين من زمان ما شفناك وعلى فكرة تره فكرتك اللي في مدونتك انك اتخلي الصور اهيه اللي تتكلم وايد حلوه
عساك عالقوة اخوي :)

someone_q8 said...

Peace
هالمقوله كنت اسمعها قبل تنقال على مستشفى العدان , اما الآن اسمعها على كل مستشفى بالكويت

ميخالف اختي تحملي هذه الكويت صل على النبي
) اللهم صلي على محمد وعلى آله وصحبه أجمعين
مشكورة على مرورك عالمدونه

Aldenya said...

المووضوع شيق
لأنه واقعي
وكوني موظفة بوزارة الصحة
وتحديدا في أحد المراكز المختصه بالأسنان
ألاحظ مشكلة تذمر المريض
بخصوص المواعيد
وانا ما ألومهم
لكن
لازم المريض يحط في باله أعذار للطرف الثاني اللى هو احنا
الجدول يكون مزدحم
مواعيد مليانه من الصبح الى نهاية الدوام
وغيره من الاسباب
وطبعا انا اتكلم عن اللى يشتغل
مو اللى حاط ريل على ريل
وماله خلق يشوف مريض

وغير هذا
ما أشوف ميزانية ماليه بصراحة
مثلا عيادتي
الكرسي اللى تقعد عليه
موجود من تبطل المركز
والمركز مو يديد عتيج
والاجهزة تم استهالكها بشكل كبير
لازم تجديد وتغيير


وعلى طاري الاشعة المقطعية
رحت عشان موعد وكان هالحجي نص خمسه
وعطونى موعد شهر تسعة
!!
والله انهم حدونى
انى اتجهة الى فلان وعلنتان " واسطه " عشان يجربون لي الموعد


وانا ما أناقض كلامي عن المواعيد
بالعكس
ياا دكتور حط لى موعد بعد اسبوع اسبوعين
شهر شهرين
بس مو 3 اشهر !!

بالوزارة
الاخطاء كثيرة ومتنوعه
تخلي الواحد يفكر الف مرة انه يروح للقطاع الخاص
ان كان وده انه يتطور ويرتقى.


وبصراحة
وزارتنا تهدم ما تبني للأسف

Eng_Q8 said...

مره كنت قاعد وف برنامج عن الصحه بامريكا

جان يحطون ترتيب اول بالخدمات الصحيه كل تقريبا عشر سنوات

تخيل الكويت قبل من ال20 الاوائل بالعالم

وعقب ما طلعت بالترتيب للاسف

كانوا يعالجون عندنا والحين احنا انعالج بره
كانوا المستشفيات الخاصه اتحولك على الحكومه وصرنا ننحاش من الحكومه

يعطيك العافيه

واتمنى اتشوف ردي على تعليقك في بوستي

وشكرا

someone_q8 said...

Aldenya
اختي مدام انج بالاسنان عيل موعدي يصير باجر مو 3 اشهر :))) اتغشمر

المشكلة اختي بالاساس اهيه الادارة بالوزارة , لانها تدري ان فيه خلل بالمواعيد في جميع المراكز و مو قاعدة اتسوي شيء ولا اتحل هالمشكلة ,
المفروض الادارة اتسوي دراسة حق جميع التخصصات واتشوف اي تخصص اللي يكثر فيه المواعيد وعلى هالاساس يتم انشاء وبناء مراكز متعددة مثل مركز الاسنان اللي بنيد القار لكن ينشؤون في كل محافظة اكثر من خمس مراكز و تكون قادرة على استيعاب المواطنين

والمشكلة الثانية الاساسية هي ان ما عندنا قرار الكل يقول خل اشوف اللي فوقي

والله المستعان

someone_q8 said...

Eng_Q8
هلا وغلا بأخوي
بصراحة اعجبتني هالمعلومه اللي قلتها عن ترتيب الكويت لان هالشيء يفرح واول مره اسمع عن هالمعلومه , وضاق خلقي عقب ما عرفت عن هالمعلومة لان قاعدين ننزل لمستويات حضيضة ومستمرين بهالشيء لي متى مادري ؟

وبالنسبة لردك علي في مدونتك العزيزة

انا ادري فيك وادري انك تحارب الخطأ وين ماكان , وكلامي لك كان عتب من اخو لأخو يحبه ويعرف معدنه

شوف اخوي انا عندي قناعة وهي الاختلاف بالحوار لا يفسد للود قضية
اختلف معاك بالفكر او بالطرح او بأي شيء ويكون هالاختلاف في الصالح العام للكل لكني ما استهزئ فيك ولا اقول عنك القاب ولا حتى اشبهك بأي شيء لان لكل فرد او انسان او حركة او تكتل او اتجاه فكر معين احترم افكاره لان هذا اقتناعه ويحترم فكري وقناعتي
الكلام هذا اللي اقول بشكل عام اخوي ما اقصدك او اقصد احد معين
ولا تنسى احنا اخوان وبديرة وحده وكلنا عيال قرية وكل من يعرف اخيه :)
سعدت بردك الجميل والروح الرياضية التي لديك حبيب وغالي

حسام بن ضرار said...

سبب تردي وزارة الصحه في اعتقادي يعود الى ضخامتها و الضغط على خدماتها خصوصاً من الوافدين

someone_q8 said...

حسام بن ضرار

تصدق ياخوي ان انا سمعت مره مادري اي وزير يقول راح نبني مستشفى خاص للوافدين عشان انقلل الزحمة
وعلى ما اتذكر كأنها الدكتورة معصومة المبارك
ولحد الآن ماكو خبر عن هالموضوع

بعثرة مشاعر said...

آخ
وزارة الصحة

أنا حاربت المستشفيات الحكوميه منزمان
لأن شيب راسي منهم

كنت أراجع في احد المستشفيات مراجعه عادية

اهمال
التشخيص + العلاج = صفر
شغلهم عفسه
غير النطرة اللي تهد الحيل
3 ساعات عشان انطر اقابل حضرة الدكتور المحترم !
جان زين على معنى

يطالعني و يطالع الملف
يسألني جم سؤال خربوطي
و السلام

!!

الحين ناطره 3 ساعات تسوي جذي !
و غربلوني

بعدين قلت شحقه شلي بعوار الراس
خاااص و فك روحك

خلصت مراجعاتي منزمان
و خلص العلاج

لو ناطره عالحكومه جان للحين ماخلصنا
و يمكن استمرض زووود

اصلا لو تلاحظون الحكومه كلا هنود و زلمات
نادر تشوف الكويتي

80% منهم كلا خاص

الله لايعوزنا لهم

Aldenya said...

صح إلسانك
هذه هي المشكلة الكبرى
وعلى فكرة
أنا ببنيد القار
:P~

صقر قريش said...

مستشفياتنا باختصار مصيبة وكارثة اللهم آجرنا في مصابنا بمستشفياتنا جوزيت خيرا اخي الفاضل.

someone_q8 said...

بعثرة مشاعر

زين اتسوين ولو ناطرة بعد جان دورج صار بعد سنه
ماتشوفين شر

someone_q8 said...

Aldenya
صح بدنج

هممم بنيد القار
اشعليج المكان كل من يبيه يعني مكان مهم , لكن الله يعينكم على الزحمة وعساج عالقوة

someone_q8 said...

صقر قريش
حياك الله ياخوي على زيارتك
وبالنسبة للمستشفيات خلها على الله , ماكو فايدة فيهم من جم سنة واهم جذيه لا تغيير ولا شيء بس فالحين بالديكور
مشكور و زارتنا البركة

فتى الجبل said...

لا توقف نبي موضوع يديد

someone_q8 said...
This comment has been removed by the author.
someone_q8 said...

فتى الجبل
ان شاء الله اخوي بس لا اتعصب علينا :)))

مو بيدي ياخوي الدوام اشويه ماخذ وقتي كله لانه نظام شفتات يومين صبح ويومين عصر ويومين ليل ويومين اووف
واغلب الاحيان اكمل زام صبح بزام عصر , او عصر ليل او ليل صبح فا ما عندي وقت كلش
وكثر ما اقدر احاول ارد على التعليقات هذا اذا عندي وقت

مشكور ياخوي على سؤالك ولك مني كل تحية

هـــدب said...

كلامك في محله اخوي واتفق معاك بكل اللي تفضلت في ذكره وهذا
شي واقع ونشوفه

ومثل مانردد دايما الجرح يزيد وما يتحمل المزيد

وكان الله بالعون

someone_q8 said...

هـــدب
مشكورة اختي على تعليقك الطيب
والمشكلة ان المسؤولين قاعدين يشوفون ولا كأن فيه مشكلة ولا حياة لمن تنادي