السلام عليكم ورحمة الله وبركاته
شاللي صاير بالديرة ؟
استجوابات على شيء يستاهل وعلى شيء مايستاهل ويا كثر اللي ما يستاهل, البورصة مو قادرة اتشيل نفسها , تخبط في التخطيط والقرار وعدم وضوح الرؤية , اتهامات مالها اول ولا لها تالي وياريت اتكون بدليل , كاميرات وتجسس بالمجلس !!! يا كبرها تجسس عاد كأنها قوية موو؟
صحف تلعب على وتر الوطنية واهيه تهدم الوطنية بحرفنه , حكومة ماكنتوش كل ساعة لها توجه وقرار وكل وزير يحفر للثاني من خلال ربعه .
علامنا اشفينا صايرين مثل العراق مو قادرين نجتمع مع بعض كل واحد يالله نفسي نفسي وكل واحد يحقر من الثاني وكل واحد يلغي الثاني سواء من الفكر او من التوجه , اللي يقرأ الصحف من بره الكويت يقول حشى هذه ديره كلها حرامية وكلها بوق ؟
محد فكر بهالشيء ؟
كل وزارة وكل هيئة وكل جهة فيها فيها اختلاسات ؟؟؟؟
مايصير مو لي هالدرجة عاد , انا ما انكر ان فيه اختلاسات بس لا نجمع كل شيء وعلى اي شيء
لما تتشكل اي حكومة على طول النواب يستلم الوزير الضعيف ويقعد له عالوحده ويهدده بالاستجواب ولا كل ساعة ناطله بقضية , واذا تغير هالوزير ويه وزير قوي يطخ هالنائب ولا كأنه امسوي لوية !!
نبي ديموقراطية وحالتنا حالة و آخر شيء احنا بنفسنا اللي نهدم الديموقراطية بأساليبنا الخاطئة واستغلال بعض مواد الدستور في الوصول الى غرض شخصي
**************ِ
توه المجلس ما امداه يبدأ اعماله من عقب حله يعني تقريبا من شهر 6 لغاية اليوم تقريبا اسبوعين اذا شلنا الاجازة السنوية للمجلس , استجوابات واتهامات وتجسس ومراقبة , يعني لو احنا بالعراق ايام صدام ولا في بعض الدول الدكتاتورية قلنا ميخالف هذا اللي قاعد يصير , محد يقول لا تستجوب ولا احد ينكر حق النائب في الاستجواب , لكن لما اشوف امور الديرة مو ماشية صح وازيد الطين بله اهنيه المشكلة ,
على فكرة ومع احترامي لأخواني واخواتي المدونيين بالنسبة لانتقادهم ان وقت الاستجواب عادي ومافيه شيء , وانا وياكم لكن ما فكرتوا ان الناس ملت من الاستجوابات ؟
ما فكرتوا ان الناس ازهقت من كثرة الاستجوابات اللي اتشل الديرة بسبب ضعف الحكومة ؟
لما انقول ان التوقيت غير مناسب مو معناته ان احنا ضد الاستجواب خصوصا ان النائب المحترم احمد المليفي مواقفه تستحق الاحترام وايضا بنود او محاور استجوابه تستاهل الاستجواب لكن مو الحين
خصوصا ان الادله عنده يعني ما راح تتغير هالادله وقالها بأي وقت ثاني
*************
فيه بعض الصحف اللي المفروض اتغسل ايدك 7 مرات قبل لا تقراها , اتسوي من الحبه تسونامي لا واتثير الفتن وكل هذا على حساب الديرة وعلى حساب مبيعاتها , مثل جريدة الوطن اللي ما خلت احد بحاله , سوت فتنه بين الشيعة والسنة , وبعدين قامت تتكلم عن الحضر والبدو وبعدين بين المناطق الداخلية والخارجية , وبعدين بين الاحزاب او خل انقول بين التكتلات , ما اقول الا حسبي الله ونعم الوكيل
***************
آخر الكلام : للأسف اقول هالكلمة اللي اثبتت صحتها
الديرة تارسها الحسد و كل واحد يطالع الثاني شنو عنده وليش خذه هالمناقصة ولا ليش امسوي اي عمل حتى لو كان عمل خير
اللي رايح للحج او العمره او اللي قاعد يصلي بأي مكان اقوله ادعوا للديرة وكلنا ندعي للديرة بأن يحفظها من كل الفتن ونقدر انعمرها بالحب والتوجيه السليم والتخطيط المدروس القابل للتطبيق
********************
اشوفكم على خير
ولكم مني كل تحية واحترام
