2008-10-20

لي متى التخبط ؟



السلام عليكم ورحمة الله وبركاته


اللي يعش في هالبلد يرى العجب العجاب وعلى قولة عادل امام في مسرحية شاهد ماشافش حاجه في مشهد المحكمة لما يبي يتذكر اسم المحامي قال : عكس عكاس ,

هذا اللي قاعد يصير عندنا بالديرة البوصلة لحد الآن مو عارفة وين متجهة كل ساعة اتجاه مرة يمين ومره شمال ومرة جنوب , وكل ساعة قرار وبعد فترة اييي وزير ويلغي القرار اللي انصدر , شالسالفة ؟

وراح انقول هالتخبط على شكل نقاط وذلك للتوضيح فقط :


* يبون الكويت اتكون مركز مالي عالمي !!

اشلون تبون اتصير الكويت مركز عالمي والواحد اذا يبي يطلع رخصة تجارية يقعد ما بين 3 اشهر الى 6

اشهر ؟

والدول المجاورة مثل الامارارت والبحرين وقطر خلال يوم واحد اتطلع الرخصة وهذه تجربة شخصية !!


اشلون تبون اتصير الكويت مركز مالي واذا الواحد يبي يشتري ارض يقعد جم شهر عشان تطلع الوثيقة و ايضا الدول المجاورة خلال يوم واحد من تشتري الارض بنفس اليوم تستلم الوثيقة !!!


* يبون الكويت تكون واجهة السياح ؟؟

من صجهم ؟ ماكو ولا دعاية شفتها تتكلم عن السياحة في الكويت ولو بالغلط , حتى مركز معلومات للاماكن السياحية ماكو , يعني اللي يبي يزور الكويت يتوهق مو عارف وين الاماكن اللي المفروض يروح لها , مع العلم ان فيه اماكن تستاهل احد يزورها لكن مافيه جهة معينه تباشر في التعريف عنها واتسوي الدعاية اللازمة لها


* يبون ديموقراطية عالمية يشهد لها الكل ؟

بصراحة على هالخبرة والتجربة الديموقراطية اللي صارلها تقريبا 43 سنه واللي المفروض انكون في مستوى راقي في طرح المواضيع , انلاقي العكس وطبعا كلامي مو للكل لكن حق السلبيات الكثيرة الموجودة في هذه التجربة مثل الصراخ لأجل الصراخ ولإثبات انني موجود بالمجلس , والتهم اللي مالها معنى بس عشان شك بالموضوع ؟؟ عجيب امر هالنائب

قبل فترة صرح نائب مجلس امه ان مشروع المصفاة الرابعة لازم يتحول لديوان المحاسبة او الاستجواب , ولما راحوا بعض الشباب لهذا النائب وقالوا له اشفيك تبي تستجوب الوزير ؟ قالهم والله انا اشم ريحة بوقة ؟؟؟؟؟؟؟ امسوي لوية وحالته حاله عشان حضرته يشم ريحة بوقه مو متأكد منها


شالسالفة ؟ شاللي صاير بالديرة يعني ليلحين هالناس ما اشبعوا من هالكيكة ؟


* الحكومة تريد الاصلاح في كافة المجالات ؟

انا بعرف وين الاصلاح اللي قاعدين نسمع عنه ليل نهار !

حكومة تنشل بكلمة استجواب !!!!!!! واتأجل جميع المشاريع في البلد عشان كلمة استجواب

حكومة ما عندها خطة استراتيجية بعيدة المدى ولا رؤية صحيحة للامور الداخلية والخارجية وماشية عالبركة !!!

اذا تبي اتشكل وزارة تتخبط وتضع الرجل الغير مناسب في المكان الغير مناسب وليس العكس ,

انسان موظف في وزارة التربية وهو وكيل وزارة يخلونه وزير للصحة ؟؟؟؟؟؟؟ حتى لو كان المنصب عبارة عن منصب سياسي لكن هم الوزير اذا كان من اهل المهنه افضل من واحد خارج المهنه

وزير تخصصه صيدلة امخليه للتجارة !!! تكفون حرام عليكم بسكم تخبط


* مجلس الامة يعطل المشاريع التنموية ؟؟


اذا الحكومة متخبطه في قرارتها , وكل ساعة لها رأي وما تبي اتزعل احد , ومجلس الامة انولد من رحم هذا الشعب وبعد فترة الشعب يتذمر من النواب !! العيل الخمال منا وفينا

نائب ينجح من خلال الانتخابات الفرعية وطبعا ينجح عشان فخذ قبيلته هو الاكثر مو عشان اهوه انسان كفؤ شنو تتوقع يطلع هالنائب ؟

نائب لان شركاته لها سيطرة وثقل في الديرة واهو حامي حماة المال العام ينجح بالانتخابات لان عائلته لها معارف كثيرة وعلى قولة البعض ولد بطنها لازم يعطونه ؟؟

نائب يتخذ من الدين وسيلة للوصول الى الكرسي وبعد وصوله للمجلس ما نسمع حسه ؟ والمناقصات اتصير له من تحت لي تحت ؟؟؟

*******************************************************************

وكل هذا يبون الديرة تتطور ؟

وكل هذا يبون الكويت اترد عروس ؟

وكل هذا يبون الكويت مركز مالي عالمي ؟

ملاحظة : الكلام اللي ذكرته عن النواب هذا للبعض وليس للكل لان لو خليت خربت وهم نماذج سيئة يجب الوقوف ضدهم


آخر الكلام : النائبين السابقين الوعلان وعبدالله العجمي مستميتين على الكرسي بشكل مو طبيعي و من بعد صدور الحكم سوا الندوات والحملات الاعلانية وكل يوم تصريح بالجرائد والتماس لصاحب السمو امير البلاد حفظه الله , اقولكم عيب عليكم والله العظيم فشلتونا جدام اللي يسوى واللي ما يسوى كأنكم موشايفين خير , يا جماعة خلاص بس مدام فيه حكم صادر من قاضي يتكلم بإسم صاحب السمو امير البلاد , ماله داعي هالصيحة وهاللوية احترموا مكانتكم بين الناس وانسحبوا بهدوء واليايات اكثر من الرايحات , بس مقيولة اللي يوصل للكرسي الاخضر يخلي عقله عالطاولة وبمطرقة المجلس يكفخه عشان يثبت مكانه


والله لو مو حبي لي هالارض و حبي ان اشوف ديرتي احسن ديرة من جميع النواحي جان ما تكلمت وتحلطمت جذيه وبهالاسلوب اللي ما احبه لكن مو مني


اشوفكم على خير


ولكم مني كل تحية واحترام

42 comments:

Bloggerista said...

صح لسانك

واقعنا مؤسف

ZooZ "3grbgr" said...

احب التفاؤل

مع إن اللي ذكرته صحيح

بس لقناعتي بأن "الاحباط معدي" يا سَمْوَنْ

أصلا احنا نبي بس خطه

ما نبي استراتيجية

ولا نبي طويلة المدى

ولا قصيرة المدى

ولا خمسية

بس خطة

:)

JiBLa CiTY said...

الشق عود يا بعد جبدي

:)

وانا اهديلك اغنية نام يا حبيبي نام
بكرة تكبر وتاكل حمام

:)

حسام بن ضرار said...

الوعلان و بن شرفان حرقوا مستقبلهم السياسي بإستماتتهم على الكرسي و عدم تقبلهم لحكم المحكمه الدستورية

صج مشكله اذا هالاشخاص ما قاموا يستحون من تصرفاتهم هذي

جنه البلد فوضى و الامور بالواسطه و حب الخشوم

الله يحفظ ديرتنا من هالاشكال

why me said...

ضاق خلقي زياده

Eng_Q8 said...

قلتلك اياها يالزميل

لا يوجد تخطييييط

مستعدة said...

:/..

Selezya said...

لو دامت لغيرك ما اتصلت إليك

الله كريم :)

someone_q8 said...

Fashionista
صح بدنج اختي
واقعنا اكثر من مؤسف يبيله نفظة من الساس

someone_q8 said...

ZooZ "3grbgr"
اول شيء حياك الله ياخوي و زارتنا البركة
صدقني ياخوي انا احب التفاؤل لكن ما اشوف اي موقف يدعو للتفاؤل , ابي اي قرار حازم يعدل الاوضاع مافيه !
والتفاؤل موجود لاتحاتي :)
بالنسبة للخطة فقط مايكفي , لان هذه دولة لها كيان ومؤسسات لازم يبيلها خطة استراتيجية تساعد على نهضة البلد
واللي ينقصنا اهو القرار ووضع الرجل المناسب في المكان المناسب وخطة نمشي عليها
تحياتي :)

someone_q8 said...

JiBLa CiTY
اوكي الشق عود ايي عاد لي متى لما يغرقنا هالشق ؟؟
ملينا من التحلطم نبي فعل نبي الامور تمشي بالعدل

someone_q8 said...

حسام بن ضرار
اخوي العزيز حسام , صدقني مدام اهم طالعين من انتخابات فرعية معناته ما سوينا شيء , والمره اليايه راح اتشوفهم واحتمال ينجحون بعد , والخمال مو منهم من اللي ينتخبهم من بره القبيله بعد
مافيش فايدة الكرسي عديل الروح

someone_q8 said...

why me
لا عادي لايضيق خلقج ولا شيء , هذا الواقع اختي شئنا ام ابينا
:))

someone_q8 said...

Eng_Q8
ركز على كلمة تخطيييييط

اخوي البشمهندس تخطيط بدون قرار ماينفع
تخطيط بدون وضع الرجل المناسب في المكان المناسب ما ينفع
الكل يكمل بعض
:)

someone_q8 said...

مستعدة

سوي روحج ما تدرين :)

ماتشوفين شر اختي ادري انج مريضة

someone_q8 said...

Selezya
هذه دولة قاعده تنهار على نار هادئة
لكن الامل بالله ثم بالرجال اللي نتأمل منهم كل خير

خربشتينو said...

رغم تفائلي
وحبي ان انظر للجهة الايجابية ..
لكن مع بكل اختصار " مع هيك " حكومة !
قتلت مع سبق الاصرار والترصد ..

كل أمل وتفائل
يداعبني !

بختصار ..كل مايحصل ..من تردي لأوضاع البلد ..

أشعر ..
انه مقصود ومتعمد ..
لغرض في نفس يعقوب ..

مدونة رائعة اخي الفاضل ..

ولد الديرة said...

الى ان يقضي الله امراً كان مفعولا

enter-q8 said...

اهي شغله وحده
نبي خطه واضحة و مدروسه
تثبت كلام الحكومة
شوف من متى و اهي ما قدمت خطة
خلها تحط خطتها

و تبينها للشعب
و بعدين تجي تقول ان المجلس اهو العائق
و صدقني يومها الشعب بيقول كلمته

كلام انشائي مكرر

ترى على فكرة اللي قاعد يصير مو تخبط
اللي قاعد يصير
و الا ماني قايل

Qanoonya~6moo7a said...

إي والله لي متى هالتخبطات اللي حاصله بالبلد

شي يضيق الخلق
:(

نبي ناس تشتغل للبلد .. للكويت
مو لمصالحها الشخصية


الله يعدل الأوضاع للأفضل
و إترد ديرتنا مثل أول و أحسن



يعطيكم العافية
:")
و باركَ الله فيك إخوي الكريم

Manal said...

واقع محزن

لو ان كل صاحب اختصاص ظل على ظجهتة
ومحد تدخل وعفس الامور ببعضها لكنا بخير
بس شنقول يا اخي

:(

مؤسف الصراحة

السياسيين ماسكين السوق

واسامي كبيرة تبي تدخل بكل مكان

واقع مؤلم

someone_q8 said...

خربشتينو
حياك الله , وبالنسبة للحكومة كل ماله واتصير ارده من قبل والله يستر من الياي

someone_q8 said...

ولد الديرة
ذيج الساعة البلد بتصير برررر :)
هذا اذا ما تلاحقنا عليها

someone_q8 said...

Enter-Q8
اخوي انتر على فكرة وللمعلومة , ان الكويت عندها خطة استراتيجية لسنة 2025
و موجودة في ارفف وزارة التخطيط , لكن ماكو تطبيق ولا اكو قرار يطبق هذه الخطة
وانا اوافقك ان لازم الحكومة اتبين هالخطه للناس واتسوي دعاية لها بحيث الكل يعرفها ومن خلالها الشعب يعرف منو اللي يعطل هذه الخطة الحكومة او المجلس

اللي قاعد يصير مو تخبط ؟؟ عيل شنوووو قول ليش متردد ؟ :)))

someone_q8 said...

₪ManaL₪
الله يعافيج اختي
والله يسمع منج هالدعاء واترد كويتنا افضل من قبل

someone_q8 said...

ManalQ8
نعم اختي نقطة مهمة ذكرتيها وهي تداخل الامور السياسية مع الامور الاقتصادية بشكل سلبي وليس ايجابي وكل واحد صاير اهو الكل بالكل
خوش نقطة احييج فيها

enter-q8 said...

حط الرديف لكلمة تخبط بالبدوي
راح تعرف شنو اقصد

Anonymous said...

ومجلس الامة انولد من رحم هذا الشعب وبعد فترة الشعب يتذمر من النواب !! العيل الخمال منا وف

دايما أقول هالشي ، بس بعد شتسوي هذا الموجود

مانبي الكويت ترد عروس لو خطيبة هم راضين

تخبط و فساد بكل شي ادولة تتآكل يوم بعد يوم

'3air said...

فكرة من زمااان بخاطري
جد لا تضحك

ودي يمسكونا احنا فئة الشباب دور انعقاد واحد بس من المجلس.. مادري جم شهر .. بس اقلها 6 شهور .. واللـــه احس نقدر نقلب الديرة و نولدها من جديد

طاقة .. عندنا
مكان الخلل..عارفينا
همة..موجودة
خير..فينا


بس منووو يسمع!!!

someone_q8 said...

Enter-Q8
بصراحة ما اعرف لاني ما اعرف باللهجة البدوية وايد :)
يعني لازم هالاحراج بوليد :)

someone_q8 said...

shahad
عدل كلامج اختي شهد
الديرة قاعدة تنوكل بشكل مو طبيعي ولا احد قاعد يبني للأسف الكل قاعد يهدم

someone_q8 said...

'3air
انا معاج بهالفكرة من ناحية و مو معاج من ناحية ثانية
انا معاج بإدخال الطاقات الشبابية بكل مكان و مو معاج ان انخلي اهل الخبرة على صوب لان اهل الخبر مثل المهدئ في اندفاع طاقات الشباب وتيسيرها نحو الافضل

انا ودي بس المشكلة ان كل واحد يقول انا اصلاحي وهذه المشكلة

Environmentalist said...

رجاء زياره مدونتي والاجابه على السؤال المطروح والذي سيستخدم في اعداد دراسه عن البيئة في الكويت
شكرا

Anonymous said...

الحديث ذوشجون ويعور القلب كل من يدور مصلحته اعرف واحد وده يهاجر ويشتغل بره!!والله حاله وصنا لي جذي الله المستعان

من زمان عنك وعن مدونتك اخونا انسان كويتي سامحنا على القصور

صقر قريش

someone_q8 said...

Environmentalist
ان شاء الله حاضر

someone_q8 said...

صقر قريش
ما منك قصور ياخوي عادي
المشكلة الديرة كل ماله و مستواها ينزل
نبي همه عاليه

سؤال said...

كلامك 100% بس لا يكون هذا الكلام سبب في الاحباط والتذمر، كثر ما هو دافع للعمل والإنجاز

فيك الخير والبركة :)

بوتشخيص said...

والله ما عتدي غير كلمة صدقت بكل كلمة

JiBLa CiTY said...

الشق عود ليما ايي خياط يخاف ربه ويرقع الشق

:)


انت فاهم وانا فاهم بلاش كتر الكلام

:))

someone_q8 said...

سؤال
حياك الله اخوي والبركة من الله و من ثم في الشباب اللي مثلك وشرواك
الكلام اللي ذكرته عبارة عن نبض قاعد ينزف وهو لتعديل كل امر سلبي وليس عبارة عن احباط , نبي الهمه لرفع البلد من هذا الوضع
شاكر لمرورك الطيب

someone_q8 said...

بوتشخيص
مشكور اخوي بوتشخيص , كفاية مرورك الكريم اللي يسعدني كثيرا

someone_q8 said...

JiBLa CiTY
احنا مانبي ترقيع الشق , نبي واحد يأسس ويبني بشكل صحيح ويكون شغله مضبوط مو واحد بس همه البوق وآخرتها منحاش بره الديرة عاد تعال فجج , وانت ادرى بشغل البناي :))