لي متى التخبط ؟

السلام عليكم ورحمة الله وبركاته

اللي يعش في هالبلد يرى العجب العجاب وعلى قولة عادل امام في مسرحية شاهد ماشافش حاجه في مشهد المحكمة لما يبي يتذكر اسم المحامي قال : عكس عكاس ,

هذا اللي قاعد يصير عندنا بالديرة البوصلة لحد الآن مو عارفة وين متجهة كل ساعة اتجاه مرة يمين ومره شمال ومرة جنوب , وكل ساعة قرار وبعد فترة اييي وزير ويلغي القرار اللي انصدر , شالسالفة ؟

وراح انقول هالتخبط على شكل نقاط وذلك للتوضيح فقط :

* يبون الكويت اتكون مركز مالي عالمي !!

اشلون تبون اتصير الكويت مركز عالمي والواحد اذا يبي يطلع رخصة تجارية يقعد ما بين 3 اشهر الى 6

اشهر ؟

والدول المجاورة مثل الامارارت والبحرين وقطر خلال يوم واحد اتطلع الرخصة وهذه تجربة شخصية !!

اشلون تبون اتصير الكويت مركز مالي واذا الواحد يبي يشتري ارض يقعد جم شهر عشان تطلع الوثيقة و ايضا الدول المجاورة خلال يوم واحد من تشتري الارض بنفس اليوم تستلم الوثيقة !!!

* يبون الكويت تكون واجهة السياح ؟؟

من صجهم ؟ ماكو ولا دعاية شفتها تتكلم عن السياحة في الكويت ولو بالغلط , حتى مركز معلومات للاماكن السياحية ماكو , يعني اللي يبي يزور الكويت يتوهق مو عارف وين الاماكن اللي المفروض يروح لها , مع العلم ان فيه اماكن تستاهل احد يزورها لكن مافيه جهة معينه تباشر في التعريف عنها واتسوي الدعاية اللازمة لها

* يبون ديموقراطية عالمية يشهد لها الكل ؟

بصراحة على هالخبرة والتجربة الديموقراطية اللي صارلها تقريبا 43 سنه واللي المفروض انكون في مستوى راقي في طرح المواضيع , انلاقي العكس وطبعا كلامي مو للكل لكن حق السلبيات الكثيرة الموجودة في هذه التجربة مثل الصراخ لأجل الصراخ ولإثبات انني موجود بالمجلس , والتهم اللي مالها معنى بس عشان شك بالموضوع ؟؟ عجيب امر هالنائب

قبل فترة صرح نائب مجلس امه ان مشروع المصفاة الرابعة لازم يتحول لديوان المحاسبة او الاستجواب , ولما راحوا بعض الشباب لهذا النائب وقالوا له اشفيك تبي تستجوب الوزير ؟ قالهم والله انا اشم ريحة بوقة ؟؟؟؟؟؟؟ امسوي لوية وحالته حاله عشان حضرته يشم ريحة بوقه مو متأكد منها

شالسالفة ؟ شاللي صاير بالديرة يعني ليلحين هالناس ما اشبعوا من هالكيكة ؟

* الحكومة تريد الاصلاح في كافة المجالات ؟

انا بعرف وين الاصلاح اللي قاعدين نسمع عنه ليل نهار !

حكومة تنشل بكلمة استجواب !!!!!!! واتأجل جميع المشاريع في البلد عشان كلمة استجواب

حكومة ما عندها خطة استراتيجية بعيدة المدى ولا رؤية صحيحة للامور الداخلية والخارجية وماشية عالبركة !!!

اذا تبي اتشكل وزارة تتخبط وتضع الرجل الغير مناسب في المكان الغير مناسب وليس العكس ,

انسان موظف في وزارة التربية وهو وكيل وزارة يخلونه وزير للصحة ؟؟؟؟؟؟؟ حتى لو كان المنصب عبارة عن منصب سياسي لكن هم الوزير اذا كان من اهل المهنه افضل من واحد خارج المهنه

وزير تخصصه صيدلة امخليه للتجارة !!! تكفون حرام عليكم بسكم تخبط

* مجلس الامة يعطل المشاريع التنموية ؟؟

اذا الحكومة متخبطه في قرارتها , وكل ساعة لها رأي وما تبي اتزعل احد , ومجلس الامة انولد من رحم هذا الشعب وبعد فترة الشعب يتذمر من النواب !! العيل الخمال منا وفينا

نائب ينجح من خلال الانتخابات الفرعية وطبعا ينجح عشان فخذ قبيلته هو الاكثر مو عشان اهوه انسان كفؤ شنو تتوقع يطلع هالنائب ؟

نائب لان شركاته لها سيطرة وثقل في الديرة واهو حامي حماة المال العام ينجح بالانتخابات لان عائلته لها معارف كثيرة وعلى قولة البعض ولد بطنها لازم يعطونه ؟؟

نائب يتخذ من الدين وسيلة للوصول الى الكرسي وبعد وصوله للمجلس ما نسمع حسه ؟ والمناقصات اتصير له من تحت لي تحت ؟؟؟

*******************************************************************

وكل هذا يبون الديرة تتطور ؟

وكل هذا يبون الكويت اترد عروس ؟

وكل هذا يبون الكويت مركز مالي عالمي ؟

ملاحظة : الكلام اللي ذكرته عن النواب هذا للبعض وليس للكل لان لو خليت خربت وهم نماذج سيئة يجب الوقوف ضدهم

آخر الكلام : النائبين السابقين الوعلان وعبدالله العجمي مستميتين على الكرسي بشكل مو طبيعي و من بعد صدور الحكم سوا الندوات والحملات الاعلانية وكل يوم تصريح بالجرائد والتماس لصاحب السمو امير البلاد حفظه الله , اقولكم عيب عليكم والله العظيم فشلتونا جدام اللي يسوى واللي ما يسوى كأنكم موشايفين خير , يا جماعة خلاص بس مدام فيه حكم صادر من قاضي يتكلم بإسم صاحب السمو امير البلاد , ماله داعي هالصيحة وهاللوية احترموا مكانتكم بين الناس وانسحبوا بهدوء واليايات اكثر من الرايحات , بس مقيولة اللي يوصل للكرسي الاخضر يخلي عقله عالطاولة وبمطرقة المجلس يكفخه عشان يثبت مكانه

والله لو مو حبي لي هالارض و حبي ان اشوف ديرتي احسن ديرة من جميع النواحي جان ما تكلمت وتحلطمت جذيه وبهالاسلوب اللي ما احبه لكن مو مني

اشوفكم على خير

ولكم مني كل تحية واحترام