السلام عليكم و رحمة الله وبركاته
انتشر الطلاق في الآونة الاخيرة بشكل لا يطاق
في آخر احصائية لوزارة العدل ذكرت ان نسبة الطلاق في الكويت 40% ؟ فقط
كثيرا اتضايق لما اسمع من احد الاصدقاء او من الاهل ان اهو طلق !
واذا سألته ليش ؟ عسى ما شر
يرد يقولك ماكان فيه تفاهم بينا , واهيه راسها يابس والسانها طويل !!
واذا سألنا البنت ليش ريلج امطلقج اتقول طحت عليه يخوني مع وحده ثانية , او ان هالريال بخييييل
وانه ماخذ كرتها مال البنك عشان يسحب معاشها
هذا موضوعنا الياي ان شاء الله
واشوفكم على خير
لكم مني كل تحية واحترام
22 comments:
و عليكم السلام و رحمة الله و بركاته ..
والله صح كلامك ..
اذا على سالفة ان ياخذ كرت البنك !
فتلاقيه من اول مخطط على المعاش !
يضيق خلقي لما احد يطلب وحدة مو بتتخرج او متخرجة و مو متوظفة
لااا متوظفة خالصة و جامعية و شايله نفسها !
عبالهم الزواج لعب ..
و بالمقابل على سالفة بخيل
الحريم صاروا ما يقدرون ان الفلوس تيي بتعب و شقى
و الدنيا شابه نااار
الوالد يسولف عن واحد
عنده اقساط و القرض و متسلف عشان يبني دور فبيتهم و اشياء ما اذكرها فوق طاقته !
الي طقيت على راسي
و مرته هدت البيت و راحت بيت اهلها
تبي بيت بروحها !!!
و اذا بقول قصص ما نخلص
لكن بالنهاية اذا خليت خربت ..
و الحمدلله في ناس واعية و تقدر ..
:)
الله ياني احب هالمواضيع الاجتماعيه والظواهر المنتشره بالكويت
تخصصي ومجالي سابقا
ناطره البوست الياي على احر من الجمر يا خوي
وصباحك خييييير يارب
:)
اغلبهم يهال
والقصد باليهال مو بس العمر .. بل بالتفكير للأسف
مادري اشلون يزوجونهم
الغالي انسان كويتي
صباح القشطة والعسل
:)
كيف الاحوال يالحبيب
:)
والله هالموضوع خطير...والاخطر النسبة التي وصلنا لها
يجب الالتفات لهذه المشكلة من قبل الجميع
تقبل مني أجمل التحايا وأرقها
اعتقد النسبة أعلى بكثير
خوش موضوع
بالانتظار
موضوع اهم من المهم و يدمر البلد من الداخل
حاط ببالي اكتب عنه بس متعيجز
كونى ادرس خارج الوطن فيوم من الايام أهمست فى أذنى احد الطالبات من الجنسيات العربية
وقالت لى ليش الكويت فيها أعلى نسبة طلاق !! من بين الدول العربية الاخرى لا وبعد حددتلى النسبة وقالت تفوق %45
طبعا انا يومها انصدمت وماعرفت ارد عليها لانى بإختصار ماعندى إحصائيات ودراسات واقعيه علشان ارد وانا واثقه
فياأخى ناطرين الأسباب بأقرب وقت مع التفصيل علشان انشوف الخللبالظبط من اى جانب يكمن
تحياتى
هذا ويهي اذا ما زادت وخصوصا اذا طبقوا اقتراحات د.رولا
والله موضوع فوق المهم ، و الأسباب بنظري وايده. و فعلاً يبيله دراسة و علاج
QiYaDiYa
حياج الله اختي الكريمة ونورتي المدونة
اختي لو كل انسان عرف حقوقه اتجاه الطرف الآخر من الناحية الشرعية و من الناحية الاخلاقية و عرف اشلون يتقبل الطرف الثاني بعيوبه وان كل انسان مو كامل جان صرنا بأفضل حال
شكرا لأضافتج الجميلة
صبا
يا هلا ومرحبا بأخيتي وصباحج خير ان شاء الله
ادري انج اتحبين هالمواضيع وبعدين مدام تخصصج معناته راح اتفيدينا بالتعليقات الجميلة كالعادة :)
حياج الله اختي
Q80 Blogger
هلا بالحبيب الكندي :)
المشكلة بعدم التقبل من الطرفين والاصرار على الراي
عاد تعال فجج :)
شـقـــران
يا هلا بالحبيب الشقري
احوالي بخير نحمده ونشكره
وبعدين ياخوي صباح العسل والقشطة اتسوي عندي حساسية :))
ايي والله ياخوي هالمشكلة منتشرة وبسهاله بعد عسى الله يبعدنا عنها وعن الجميع
ma6goog
هلا بالغالي اخوي بوسلمى
والله ما الومك انك متعيجز عنه لانه بصراحة موضوع كبير ومتشعب يحتاج الى جهد وبحث ومتابعة لكن ان شاء الله تكتبه ونستفيد منه كالمعتاد
moonq8
هلا بأختي الكريمة
ان شاء الله راح تقدرين عن هالمشكلة بشكل واضح وراح ازيدج بالتقارير السنوية
Enter-Q8
يا هلا ومرحبا بالحبيب بوويليد
والله ياخوي نتمنى انها على الاقل تقل وماتزيد
وما ادري عن اقتراحات د. رولا ؟
I7na 3shagnaha
يا هلا ومرحبا
آسف على التأخير بالرد لاني ما انتبهت
ومشكورين على المتابعة ماقصرتوا :)
Anonymous
مشكور اخوي على اللنك لكن للأسف الموقع تحت الصيانة وما قدرت ادش واقراه
ماقصرت
سوق المناخ
يا هلا ومرحبا بأخوي حياك الله
الموضوع متشعب وايد وان شاء الله نقدر على الاقل انبين وين الخلل و انتوا بعد ما راح اتقصرون بالاضافات الجميلة
لأن اسباب الزواج هي المشكلة
ولد الديرة
هلا بالغالي اخوي الحبيب
صدقني كل شيء بيدنا اذا احنا نبي نتغير للأفضل
يعطيك العافية
واحنا بالانتظار
Post a Comment