2009-09-29

خل نبني بدون كلام زايد


السلام عليكم ورحمة الله وبركاته


شاللي قاعد يصير بالديرة ؟ نواب يبون يسقطون المديونات , ونواب يبون لكل مواطن 15 الف دينار نصها منحة , و امسوين لوية هالنواب كأن الديرة مافيها مشاكل غير مشكلة الديون , والله ما اقول الا عيب عليكم لعبتوا على العالم لعبة الديون من اكثر من 4 سنوات او اكثر وخليتوهم مدودهين وكل تفكيرهم اشلون يطيحون عليهم الديون اللي عليهم , وخليتوا الديرة بس مشكلتها الديون ! وخطط التنمية طبعا غير موجودة , ابي نائب يمد ايده للحكومة اللي مو عارفه وين الله قاطها ويقترح عليها مقترحات ايجابية تفتح النفس ماكو , ابي نائب ما يتحلطم على الاوضاع اللي صارها دهر موجوده ويقدم خطط بعيده عن منافع مادية او حزبية او عائلية او قبلية او طائفية ... صعبه مو ؟

يا جماعة الخير من نواب و حكومة لا تخلطون المسؤوليات معا بعضها البعض , مجلس الامة صار سلطة تنفيذية يتحكم بالتوظيف ويحط المسؤلين على كيفه والحكومة صارت سلطة تشريعية , اتفكر اشلون اتواجه النواب واشلون تنحاش من الاستجوابات ,


اللي قاعد يصير للأسف عدم تحمل المسؤولية بشكل كامل ولا ننسى غياب الضمير عند المسؤولين , واذا الواحد صار مسؤول حط بباله انه مهمته فقط التوجيب والرزه وقص الاشرطة لإفتتاح المعارض ونسى ان مهمته حجمها اكبر من الموظف العادي , وان المسؤول قبل لا يصير مساءل من قبل الوزير لازم يحط بباله انه مساءل من رب العالمين وهالكلام بعد للوزير مو بس المدير



صارت الامور التافهه في هالزمن اهيه المهمه والخلافات اللي صارها اكثر من 1400 سنة لحد الآن موجودة وكل واحد يطعن بالثاني , ولا مهتمين باللي قاعد يصير حواليهم وان الناس قاعده لهم قعدة بكل شيء من تدمير للأخلاق بشكل تدريجي وادخال الثقافات الهدامة اللي اتزيد الشقوق والحقد والغل بيننا واللي ما منها اي فائدة

وين العقلاء من الديرة , لي هالدرجة صار صوت الصراخ اقوى من صوت العقل , لي هالدرجة صارت الطائفة ولا القبيلة ولا العائلة ولا الحزب اهم من ارضنا ومن بناءها بشكل جميل , بسكم حجي , بسكم مهايط جدام الناس وان احنا اول دولة سوت هالشيء واحنا اول دولة اقامت المشروع الفلاني لكن ..... وبعدين شنو صرتوا ؟ , بسكم اساءة النية للطرف الآخر وقعدوا ابنوا بلدكم اللي قاعد كل يوم ينهدم فوق راسنا واحنا مو حاسيين فيه , ابنوا بحسن النية وتركوا عنكم عقلية المؤامرات وان انتوا الصح فقط والباجي ما يعرفون شيء , ابنوا ديرتكم بالعمل اللي يرضي ربكم وتركوا السلبيات اللي اتشوفونها معاكم لانها اهيه اللي اتخليكم بس تتحلطمون وتتكلمون بدون اي عمل وبالنهاية يظل الحال كما هو .


وبعدين في شغلة ثانية وهي التجار بجميع فئاتهم اللي مو امخلين على المواطنين شيء عسى ما اسمعوا فيه زيادة لو 50 دينار زادوا اسعارهم اكثر من 100 دينار , وطبعا محد يقدر يوقف جدامهم لان الحكومة وياهم وما تقدر اتطبق عليهم اي قانون ضدهم , نبي ايد وحده ضد اي زيادة على الاسعار وانصير ايده وحده و ما نشتري اي بضاعة انعرف ان سعرها زاد , خل يكون لنا كلمة ضد التجار اللي ما يترس عينهم الا التراب و التراب اللي يترس عينهم هو عدم الشراء لمدة معينة وانوصل رسالة لهم ان خلوا بضاعتكم اتخيس بالمخازن لما اتنزلون السعر , وهذا مو شيء صعب لان اخوانا في السعودية سووها لما زادت احدى شركات الالبان الاسعار ما شروا منها شيء لمدة اسبوعين او اكثر واشتروا منتجات الالبان من شركة ثانية , فكانت النتيجة ان الشركة اللي زادت الاسعار ردت اسعارها القديمة غصبن عليها


*** آخر الكلام ***


* خل نتكاتف مع بعضنا من حضرنا وبدونا وسنتنا وشيعتنا ونبني احلا بلد وتكون الديرة نبراس للعلم والتنمية

* خلونا نترك الكلام اللي ماله معنى ونبدأ بالعمل الجدي اللي له ثمر طيب على اجيالنا

* خل انكون ايد وحده ضد اي زيادة للأسعار ونعلن للكل ان عندنا وعي كامل ونقدر نختار البضاعة اللي تناسبنا

* خل انحاسب النواب بالفعل وانعلمهم ان اذا ماسويت شيء للديرة مالك فرصة ثانية

* احنا حاليا نمر بمرحلة حرجة من تدهور الخدمات على جميع المستويات واذا ما توحدنا راح انغرق كلنا

* خل نترك سوء النية ونتجه لإحسان النية للآخر وقد روي عن عمر رضي الله عنه أنه قال: (لا تظن بكلمة صدرت من أخيك شراً وأنت تجد لها في الخير محملاً).


اشوفكم على خير ان شاء الله

ولكم مني كل تحية واحترام

18 comments:

why me said...

* خل انكون ايد وحده ضد اي زيادة للأسعار ونعلن للكل ان عندنا وعي كامل ونقدر نختار البضاعة اللي تناسبنا

=====


لون نكون إيد وحده ضد ارتفاع الاسعار؟؟



لان صج صار شي لا يحتمل

!

Eng_Q8 said...

صح لسانك

أهل شرق said...

عقلاء هالبلد ماتوا سنة 65

enter-q8 said...

ايه الشق عوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووود
وانا اخوك

someone_q8 said...

why me
يا هلا ومرحبا بأختي الكريمة نورتي المدونة وعودا حميدا بعد الغيبة
نعم نحتاج انكون ايد وحده ضد كل شيء سلبي ومدام راح نسكت على كل شيء عيل نستاهل اللي يحصل لنا

someone_q8 said...

Eng_Q8


هلا بالحبيب بشمهندسنا
صح بدنك ياخوي لاهنت

someone_q8 said...

أهل شرق
يا هلا بالغالي

والله ياخوي اللي موجودين الحين البعض فيه الخير لكن الطمع والجشع صاير بزود اكثر من المعقول وامصخت السالفة ولا احد قادر يسوي شيء

someone_q8 said...

Enter-Q8

يا هلا بالحبيب الغالي اخوي انتر
كل شق نقدر انخيطه ونردمه لكن منو اللي يسوي هالشيء ؟ طبعا ماكو غير ان نكون ايده وصوت واحد ضد هالسلبيات ونبني هالشق بدل ما يتسوع اكثر واكثر

why me said...

هلا فيك تسلم على الترحيب الحلو


قولي أخوي شلون انكون ايد وحده والاغلب يبون يتميزون ومايبون احد يقلدهم هذا غير اللي شايفين نفسهم


ترا وايد ناس جذي بالمجتمع

يعني شلون بتكاتف شلون بنكون ايد وحده
أتمنى صج نكون ايد وحده

someone_q8 said...

why me

يا هلا بأختي الكريمة , تستاهلين كل خير

واذا اشلون انصير ايد وحده ! لازم انصفي النوايا وانسوي حملة كبيرة سواء اعلامية او من خلال المدونات او المنتديات وحتى بعد في زوارات الاهل ونقنعهم باللي نبيه والهدف منه

نعم كلامج صحيح ان فيه ناس ما راح يتفاعلون و تلقينهم يحبون نفسهم ومالهم شغل لكن اذا فكرنا بشعب كامل راح نلقاهم انهم يعتبرون اقلية وهالنوعية من الشعب اللي علينا انسويه لهم والباجي على رب العالمين
احنا انسوي اللي علينا ونتوحد بالكلمة وبالفعل وكل شيء يصير بالتدريج :)

فريج سعود said...

ايدنا بايدك

Anonymous said...

كويتيين

بسكم تحلطم

من زود الفراغ

why me said...

معاك عيل


:)

متزوج 3 وعمري 28 said...

كنت في تشيليز من كم يوم
وتفاجأت إنه زايد اسعاره
..
الغريب أن المطعم ماشي زين في الكويت ومو خسران
ليش يزيد أسعاره؟؟

someone_q8 said...

فريج سعود
يا هلا بالحبيب اخوي بوسعود أعتذر عن التأخير , معناته لازم انسوي حملة في كل المدونات وان شاء الله راح اكتب بوست عن الحملة وانشوف ردة فعل الناس

someone_q8 said...

Anonymous said...
السلام لله ياخوي :)
التحلطم بدون عمل ينقاله فراغه لكن اذا فيه نتيجة واثر على الناس راح يكون له الاثر الطيب في التغيير

واتمنى ان اتعرفنا عليك بدل ما تكتب عمياني ويكون مكان اسمك فارغ

someone_q8 said...

why me
توكلنا على الله :)

someone_q8 said...

متزوج 3 وعمري 2
حياك الله اخوي في المدونة وزارتنا البركة
اخوي العزيز مهما كان المطعم امورره ماشية و مبيعاته قاعده اتزيد فالطمع بالزيادة الاكثر هو الاهم عندهم والسالفة مو واقفه على تشيليز او غير لكن المشكلة لما يكون صاحب الشأن هدفه الربح بدون اي اعتبارات تكون المشكلة اكبر