2009-11-03

بدون خدم !!!!!


السلام عليكم ورحمة الله وبركاته


الموضوع اليوم اشوية خيالي يعني مو موجود على ارض الواقع واذا اصبح واقعا فسوف نرى العجائب !!

يا جماعة الخير خلونا نتخيل اشوية اذا بيوم من الايام اصدرت الدول اللي لها خدم في الكويت ودول الخليج قرار بمنع ابتعاث اي خادمة للعمل في الخليج بشكل عام وبالكويت بشكل خاص ! يعني بالعربي كل الخدم اللي بالديرة راح يسافرون لديارهم , وماكو ولا خدامة بالكويت , شنو تتوقعون يصير بالديرة ؟؟؟؟؟


راح اقول بعض التصورات اللي اتوقع انها تصير بسبب عدم وجود الخدم منها :

1- سوف ينتعش سوق عقار البيوت بو دور واحد ويرخص عقار البيوت ذات الطابقين ( طبعا البيوت اللي مافيها شقق للايجار ) , يا عيني

2 - سوف تقل نسبة السمنة بشكل كبير في جيل الشباب والشابات ويصبح قوامهم جميل بفعل الحركة الدائمة داخل البيت وبالتالي تقل نسبة العنوسة بالكويت .

3- عيادات التغذية الخاصة سوف تعلن افلاسها ويعود اطباءها الى العمل في القطاع الحكومي

4- تقل نسبة الطلاق في الكويت وذلك لعدم وجود حجة لدي الرجال بأنه يريد زوجة رشيقة و قوامها جميل بدل امرأته الاولى ذات الكرش الكبير

5- سوف يصبح الجيل الجديد جيل قادر على مواجهة التحديات والصعوبات لانهم تربوا على الاعتماد على النفس وليس جيل اتكالي كالذي نراه اليوم لدي البعض



وهناك الكثير من التوقعات التي سوف نقرؤها من خلال تعليقاتكم الثرية



**** زبدة الحجي ****


هذا البوست خيالي بالدرجة الاولى

نريد جيل يعتمد على نفسه وليس جيل اتكالي



اشوفكم على خير ان شاء الله

ولكم مني كل تحية واحترام

32 comments:

enter-q8 said...

واحد من الربع توه مطلق قلت له يا فلان ليش وما ليش
قال خالد انا طليقتي ما تشتغل
و عندي خدامتين شنو تبي اكثر من هالسبب

فريج سعود said...

الريوق بيض وطماط

الغدا بيض وطماط

العشا بيض وطماط

AliMorning said...

بتروح الزحمة عند دوار الشيراتون يوم الجمعة والأحد


و بيطيح سوق التلفونات المستعملة :)

Q80 Blogger said...

والله لا حظناها في سكن الطلاب في الجامعات الاجنبيه

تشوف الطالب الكويتي ما يدري شيسوي وضايع وانا اولهم .. طول حياتنا اتكاليين

اما الطلاب الثانيين فتشوفهم عارفين كل شي ويدبرون حالهم بالغسيل والطباخ وغيره وغيره


عن نفسي أتمنى ما أدخل خدامه في حياتي !
بس حتى هذا للأسف .. حلم

نمووول said...

وتنتهي مشكله الزحمه :)

بـــريـــ( ألـمـاس )ـــق said...

هههههههههههههههاي

والله مااقدر اضيف على اللي قلته ياخوي واللي قالوه اخواني ..

الا الشكر لك ..

دمت بكل خير ..

الغدوف said...

وإظافة لماسبق

هذا يعني أن يحظى الأطفال بحنان الأم
كاملاً ورعايتها

وهذا يعني أن تقل حوادث السحر والشعوذة بغية الإنتقام من سوء المعاملة
وهذا يعني حقناً للمال المستنزف من جيب الأب نهاية الشهر

حلم جميل مستحيل

شكرا لك

may said...

أخوي انسان كويتي..

والله انا جربت شهرين بدون خدامة ولا سايق ، طاح عليهم واحد من الجيران (.......)جان اسفرهم اثنيناتهم

المهم تميت شهرين بدون خدامة ولا سايق
اطبخ وانظف واغسل هدوم واضرب اوتي
واروح الدوام واييب المدارس


ماكان عندي وقت أدرس واساعد الصغار في حل الواجبات وهذا أكثر شي حطمني نفسيا

ولا عندي وقت لأي زيارات ومواجيب وعاذريني كلهم

ولا عندي وقت اسوي أكلات حلوة وافنتق بالطباخ


نسيت حتى الكحل اشلون أخطه!!

أمهاتنا أول كانوا بلا وظايف
وغير هذا ، كان الرياييل يقومون بالبيت ، الحين الزمن تغير ..

يعني انت شايف الأجارات الحين شلون غالية ، إذا مو الزوجين موظفين ما يقدرون يعيشون .. الالتزامات كثرت والعيشة غلت..

الخدم نعمة ، بس المشكلة إذا اتكلنا عليهم زيادة عن المعقول ..

***

^_^

قرت عيني
قبل امس وصلت خادمتي..

someone_q8 said...

Enter-Q8

يا هلا بالحبيب بوالوليد , ما اقول الا لا حول ولا قوة الا بالله , المشكلة ياخوي ان القناعة هالايام مالها مكان عندنا

someone_q8 said...

لعنة حلت على البشرية
حياك الله وشكرا

someone_q8 said...

فريج سعود
يا هلا بالحبيب بوسعود تره البيض ساعات يوهق واتسويه مع قشوره , تبي اشلون خبز وجبن قلاص وايد اسهل واسرع :))

someone_q8 said...

BoHSaiN
يا حيالله الغايب الحاضر اشلونك ياخوي لك وحشه والله
اييي والله الزحمة اتخف والسيارات تمشي بشكل طبيعي ما تلقى واحد ماشي عالبراد وناسي عمره بالطريج

someone_q8 said...

Q80 Blogger
يا هلا بالحبيب , شيء طبيعي اتشوف هالشيء بره لان اهناك ماعندهم وقت كل من يرتب اغراضه بنفسه ولا تنسى ان تكلفة الخدم هناك اغلى و مميزاتهم غير ولهم شروط ما راح تلقاها عندنا

someone_q8 said...

نمووول

يا هلا بالغالي , ايي والله صدقت ياخوي على الاقل ما تلقى واحد بالخط السريع ماشي بسرعة 60 وامخلي العالم تتحلطم عليه :)

someone_q8 said...

عاشقــ( في زمن العقـلاء )ـــة
اول شيء حياج الله اختي في مدونتج الثانية
والشكر الاكثر لج لمرورك الكريم مع ان كنا نود اسهامج في بعض الافكار

someone_q8 said...

الغـــــدوف
يا هلا بأختي الكريمة , والله يا اختي صدقتي بكل كلمة كتبتيها , والله يهدي الجميع الى كل خير

على الاقل الجرائم تقل عندنا الى الربع

someone_q8 said...

مـي
يا هلا بأختي الكريمة , اول اقولج بيض الله ويهج دنيا و آخره واللي سويتيه ان شاء الله ما يضيع عند رب العباد ويعوضج بالاحسن ان شاء الله وهالتعب كله له اجر ان شاء الله , والكلام اللي قلتيه بالنسبة للأجار يعور القلب لان اغلب المتزوجين يعانون منه لكن ما انقول الا اللهم اكفنا بحلالك عن حرامك
وقرت عينج على الخدامة اليديدة ويعطيج خيرها ويكافيج شرها :)))

Salah said...

جان زين!

الحارث بن همّام said...

عز الله انك صاج :)

بتكون صعبة في البداية .. بس مرنا بنتأقلم ونعوّد

ReLaaaX said...

اللي متعلم إن يسوي شغله بنفسه ماراح يعاني وايد لما تسافر الخدامة والا تكون موجودة !

هذي شغلة .. الشغلة الثانية اللي لازم الناس تفهمها إن الخدامة = مساعدة وليست ربة بيت ثانية

يعني أحتاجها تساعدني بالتنظيف والخمام ممكن .. غسيل المواعين هم ممكن .. الأوتي يعني الشغلات اللي تاخذ من وقتي وجهدي راح اخليها

بس عاد تدخل داري ؟ وتسفط لي هدومي ؟ وترتب فراشي ؟

لا وباجر لي رزقني الله عيال بتجابلهم وتغسلهم وتبدلهم وتوكلهم ؟
عيل ليش آنا عايشه ؟



ما أنكر إن الخدامة / السايق شـر لابد منه .. بس الشخص نفسه يحدد شغل الخدم وشغل الشخص نفسه



ولو الناس تتقاسم المهام في البيت جان ماصار حق الخدم داعي :))


بس الواقع المؤسف إن كل واحد همه نفسه .. زين انتو مسئولين عن بيت وعيال !؟

يعني شوف المدارس مثلاً .. آنا وحده أشوف إن الاغلب أمهات وسواق
زين ليش ماتكون مسئولية المدرسة على الأبو ؟ خل المدارس .. الطبيب !؟ الجمعية !!؟

يعني الأم توصل وتودي وتغسل وتربي وتنظف وتخم ؟

لو كانت الشغلة من الأول مقسمه صح .. جان ممكن نقول إن فيه تقصير من الأم .. بس التقصير من الأثنين للأسف الشديد فالحل الأمثل إن يكون فيه ناس تشيل جزء من هالمهام .. وبالتالي يكون الهم الكبير هم التربية اللي لازم عاد يكون متساوي بين الأثنين

تبي الصج ؟ الحين حتى الأم والأبو مالهم خلق عيالهم .. مادري ليش من الاساس اييبونهم


يعني ام موديه بنتها يكون تخليها تلعب بالألعاب .. يعني المفروض الطلعه حق البنيه .. تقولها لعبي خلصينا !؟ زين ليش موديتها إذا مالج خلق أصلاً ؟



بس آنا هالموضوع ما أحبه وإن تحجيت فيه ماراح أخلص :)

وحدددك منغث من سالفة الرشاقة والوزن ;p

lilly said...

لووووول بتشوف الكويت خاليه و المجمعات فاضيه كل وحده مجابله البيت و المطبخ و كرااااف

someone_q8 said...

Salah
صعبه مو ؟ :))

someone_q8 said...

الحارث بن همّام
يا هلا بالحبيب , كل شيء في بدايته صعبة لكن مدام فيه بدائل كثيرة مثل تطور الاهزة الالكترونية المنزلية اللي كل يوم شيء يديد اعتقد راح اتصير الامر اهون اشوية :)

someone_q8 said...

ReLaaaX
يا هلا بأختي الكريمة , هذا وانتي ما اتحبين الموضوع وما شاء الله كاتبه بوست :)))
اختي انا اتفق معاج بكل اللي ذكرتيه وخصوصا توزيع المهام بين الزوج والزوجة وطبعا الزوج يتحمل الحمل الاكثر وهذا المفروض منه مو طيب منه , لكن التربية والتنشأة لها دور كبير في ممارساتنا الحياتية قبل الزواج وبعد الزواج , وهذا اللي قاعد اشوفه ان مافيه احد يبي يتحمل مسئولية ويقتنع ان ها واجبه

وسالفة الوزن والرشاقة مافيه احد ما يفكر فيها خصوصا في هالايام الي صارت الوجبات السريعة اهيه الاهم في حياتنا وانا اتكلم طبعا عن هالفئة الاتكالية
اشكرك اختي على اثرائك للموضوع

someone_q8 said...

lilly
اهلا وسهلا اختي الكريمة , عاد بعدين يقولون ان الاقتصاد راح ينهار !!!!
على الاقل احسن عشان الواحد اذا يبي يشتري شيء يلقاه بسهالة وسعره اقل اشوية :)
حياج الله اختي وزارتنا البركة

ReLaaaX said...

ايي مو قلت لك إذا تحجيت ماراح أخلص .. فهذا بعض مما عندي ;p


عموماً الحل بإن يكون فيه دورات بهالمجال تأهل هالناس اللي راح يقبلون على حياة يديدة ومسؤولية يديدة

والناس اللي بدو هالحياة فيه امكانية انهم يتعدلون لأن برقبتهم أجيال ياية


أما عاد الأجيال الأقدم فالله يعينهم على بلواهم :)



--


أما عاد الوجبات السريعة والانتشار الفظيع للمطاعم فهذا يعتمد بالدور الأول على نظام البيت .. فإذا اللي بالبيت كلهم الله بالخير شي طبيعي بتشوف أبناء اليوم رجال / نساء المستقبل عرض الباب

وإذا الوجبات السريعة ماتنوكل إلا بالحالات الاضطرارية مع اختيار افضل السيء إن صحت التسمية .. فمافيها شي



ومافيه مشكله بالدنيا مالها حل :))

QhyoRa said...

على طاري خيالي
ذكرتني بالروايات و المسلسلات
اللي يكتبون ان القصه من وحي الخيال
ولا تمت للواقع بصله واهما مشلخين الواقع تشلخ عموما دام الشي خيالي خله يبقى بالخيال ولا يطلع لان ان طلع بيتيحش عدل .. ياخوي ذاك الزمن مو نفس الزمن و كل شي بالتعود يصير بس عقب ما تقدم كثير من القرابين والخساير مو اللي يبي شي لازم يترك شي ولا تترك الا الشي العزيز الغالي وتوصل للهدف المنشود شلون ووين وشنو مادري بس ..شي صعب وجدا

Peace said...

راح ينتشر حس المسئوليه عند الشبان و الشابات

مثل ما
عشنا بالازمه من غير خدم

someone_q8 said...

ReLaaaX
اهلا وسهلا مره ثانية وحياج الله بكل وقت وهذه مدونتج اختي اخذي راحتج
اتفق معاج باللي تفضلتي فيه ان لازم يكون فيه دورات مكثفة تختص بالتنظيم والمسؤولية في الحياة الزوجية قبل الزواج اللي من خلالها يكون المقبل على الزواج عارف شنو اللي له واللي عليه
وبالنسبة للوجبات السريعة فا ايضا يبيلها توعية كبيرة من خلال وسائل الاعلام والدورات اللي اتبين مخاطرها

someone_q8 said...

QhyoRa
حياج الله اختي الكريمة في مدونتج , والكلام اللي كتبته لو اتلاحظين انه عبارة عن تصورات ما راح اتصير بالواقع ولكن يعبر عن بعض السلبيات السلوكية الموجوده بالحاضر
اختي الكريمة لما يصير عندنا تنظيم في الحياة و تكون المسؤولية لدي الزوجين معروفة لدي كل واحد ونعرف ان الخدامة لها مسؤوليات محدده وهي عباره عن مساعدة وليست مسؤولية شاملة اهني الكل يرتاح

someone_q8 said...

Peace

يا هلا ومرحبا بأختي الكريمة والله كلامج عين العقل والصواب , صدقتي باللي قلتيه

Anonymous said...

انا بالنسبة لس ما عندي خدامة مستديمة. وحدة اتيي 3 ساعات باليوم حق تنظيف الأرضيات وتكرمون الحمامات! غير هذا انا اسوي كل شي لاوعندي بنت عمرها 3شهور وأشتغل بعد! بس الناس تحب تحط حجج! العالم كلة عايش بدون خدامات! الأجانب ايدامون لين الساعة 6 و هم ماعندهم خدم! احنا صاروا الخدم اساسيات لأن بيوتنا كلمالها وقاعدة تكبر! وكل ياهل عندة غرف خاصة و حمام بلت ان!