2010-01-15

هذا سيفوه


السلام عليكم ورحمة الله وبركاته


بهالديرة كل واشوي ونلاقي امور عجيبة وللأسف انها تهدم ولا تبني مثل


اللي يشتغل عدل يقولون عنه موصاحي وخبل واللي كله طبيات واجازات واذا داوم ما يتحرك من مكانه بس سوالف يصير خوش واحد !!

اللي يشتغل يعتبر من اغبى الناس لانه يكرف ويحر قلبه على الشغل ووقت التقدير البونص لغيره من اللي ما يشتغلون والتقدير جيد جدا والامتياز حق اللي يمسح جوخ و يقول كلام حلو يعني شغل بوليش

الأجنبي والمقيم كلامه كله صحيح والكويتي مايعرف شيء !!!

اللي يتعب بالدراسة الجامعية ويحصل درجات عالية حاله حال اللي اييب مستوى جيد ويتعين معاه بنفس الوظيفة , عيل وين التمييز بالتوظيف ؟

بالقطاع النفطي خصوصا وبالدولة بشكل عام يتساوى حاصل الشهادة الجامعية اللي ماخذها عن تعب وجهد مع اللي عنده شهادة جامعية اللي ماخذها بتعب شهر او اسبوعين دراسة ؟؟

اللي يقول الصج يصير معقد وما يفهم شنو قاعد يصير حواليه ولا يواكب التطور , لكن اللي يحور الحقيقة ويسب اهوه الفاهم !

وبسنا حسد تره اللي ذابحنا اهو الحسد اللي عسى محد خذا مناقصة الا اقعدوله قعدة ليش فلان ماخذ المناقصة واشمعنى اهوه اللي ماخذها واكيد يبون يربحونه وتعال شوف الكلام اللي ينقال عليه


للأسف اقولها : ما عندنا بالديرة مفهوم صحيح للديموقراطية ولا تطبق بالشكل الصحيح سواء بالقول او بالعمل والدليل تفشي سياسة الغاء الطرف الآخر وتحقيره وتسفيهه واكبر مثال موجود مجلس الأمة واللي اشوفه انه مجلس للديوانية



هناك قاعدة تقول ان لم تكن معي فأنت ضدي وياويلك اذا صرت محايد ولا راح اتكون انسان منافق
عند البعض وياكثرهم نظرية التآمر على اي موقف او اي كلمة تنقال من الطرف الآخر لمجرد انه يعارضه في الرأي


الديرة قاعدة اتغرق والحبايب نواب الامة قاعدين يدورون اي زلة او اي هفوة عشان يقدمون استجوابات وتعال اخذ تصريحات وكلام اقل ما يقال عنه كلام صبياني


بسنا حجي ومزايدات وخل ننجز ونبني الديرة مع بعض بدون تفرقة هذا حضري وهذا بدوي وهذا سني وهذا شيعي , انا بعرف ما نتعلم من الدول المجاورة والقريبة وانشوف شنو سوت فيها هالفتنة ؟ شنو سوت فيها هالتفرقة ؟


قضية مزدوجي الجنسية يجب ان تحل بشكل سليم وبشكل عااادل ويطبق القانون على الكل بدون استثناء , واللي عنده اكثر من جنسية مايشوف شر يروح حق الدول اعطته جناسيها ويخفف علينا طلبات الاسكان والامور الاخرى


اللي قاعد يشوف انه تضرر من اي انسان سواء بالقول او بالفعل فهناك قانون يحمي الجميع والقانون فــــــــــوق الجميع , لان السالفة امصخت اذا كل ساعة نازلين الشارع وامسوين تظاهرات وامعطلين مصالح العالم وتهديدات علينة , وين قاعدين ؟؟ بأفريقيا


خل نحترم القانون وانطبقه على الكل بدون استثناء ونتفاهم مع بعض بالحسنى
الكلام اللي كتبته تتحمله الحكومة والشعب , وبما ان الشعب من ضمن الحكومة ويشارك في القرار والتخطيط فإن الشعب يتحمل الجزء الاكبر في كل هذه المشاكل اذا تخطينا المزاجية في التعيين وفي التقدير وفي وضع الرجل المناسب في المكان المناسب , عندها نقدر انقول ان راح تتحسن الاحوال




اشوفكم على خير ان شاء الله


ولكم مني كل تحية واحترام

6 comments:

{ .. صدى said...

سـلآم عليكم ../

للأسف ان ][ خليجنـآ ][واحد ..!

واكثر ما يغيضني .. هو مكانة الاجنبي في ][ الدول ][ الخليجية ..
ليس حسدا .. ولا انانية .. لكن احقاق الحق .. على ][ عينا ][ وعلى روسنا ..
لكن الاقربون ][ اولى ][ بالمعروف ..

عموما .. دائما][ يقـآل ][ ان صلاح الشعب من صلاح الحاكم ..
وصلاح الحاكم من صلاح البطانة ..!

اللهم نسالك ][ لامراؤنا ][ وحكامنّآ البطانة الصالحة ..
ووفقهم لكل خير ..


بارك الله فيك ..
وحفظ ][ الكويت ][ وكل ارضِ لأهلها ..

أختكمـ ..
صدى .~.

enter-q8 said...

ههههههههههه
توك تدري

فريج سعود said...

وعليكم السلام ورحمة الله وبركاته
حياك الله

هذا الحلو بالكويت
ان كل شي فيها عوي ومع ذلك ماشية

الله سبحانه وتعالى ساتر علينا ولا لو ديرة ثانية يصير فيها هالشي جان صارت تاريخ من زمان

someone_q8 said...

{ .. صدى

يا هلا بأختي الكريمة , بالنسبة للأجنبي فهذه النظرة ما راح تختفي لان لحد الآن لدينا ان الاجنبي افضل من المواطن وان هذا الاجنبي لديه خبرة اكثر من المواطن

ومشكورة اختي على الدعاء الجميل ونقول اللهم آمين

someone_q8 said...

Enter-Q8

هلا بالحبيب , لا الله ياخوي مو توني ادري لكن السالفة امصخت ووصلت لمرحلة ان ماكو فايدة بالوضع اللي قاعد يصير من سوء الى اسوأ

someone_q8 said...

فريج سعود
يا هلا بالحبيب , اخوي الديرة ماشية على البركة لا تخطيط ولا شيء