2008-08-15

العجوز الشمطاء






السلام عليكم ورحمة الله وبركاته


اليوم سوف نتكلم عن عجوز عرفت بالجمال الخلاب والتي تعطي ابناءها كل ما يريدون من مال و امان اقتصادي واجتماعي وسياسي ايضا , وبصراحة كانت هذه العجوز الشمطاء في السنوات الماضية في قمة جمالها ونشاطها الخيري في تدعيم الدولة بما تحتاجه من امن واستقرار على جميع الاصعدة الحياتية , ولكن بعد الغزو بدأت هذه العجوز بالتهالك والعجز والتعب وبإنتهاء مقدرتها على العطاء , قرر ابناءها البرره ان يعتنوا بها و تتقاعد من الخدمة نهائيها حتى ترتاح , وفجأة فكر احد ابناءها بفكرة وهي ارسال جدتهم الى العلاج بالخارج وعمل جميع عمليات التجميل من شد وتفخ وتبييض الاسنان وتجديد بعض الشرايين والاوردة التي تحتاج الى تبديل , وقبل باقي الابناء هذه الفكرة خصوصا ان جدتهم لديها بعض القوة للقيام بمهامها , تقبلت جدتهم هذه الفكرة على مضض وقالت سوف اقبل هذه الفكرة ولكن لا اعتقد اني سوف اعطيكم من الجهد ما يكفي من عمري , فقالوا لها انتي تامرين امر .


كافح الابناء وجميع افراد العائلة وذلك بدفع قيمة تكاليف عمليات التجميل الباهظة حتى تعود عجوزهم الى العمل بهمة ونشاط , وفعلا بعد هذه العمليات عملت هذه العجوز بكل همة ونشاط و من خلال عملها ربح جميع افراد العائلة اموال كثيرة واستقرار كبير , وبعد عدة سنوات من العمل عند سنة 2000 قام احد ابناءها الكبار بإعطاء بعض التعليمات الديكتاتورية للعجوز بأن تضاعف من هذا النشاط , و من خلال القرارت الديكتاتورية التي امر بها للعجوز ادى ذلك الى تدهور صحتها من جديد وذلك بأن العجوز قامت بقتل اثنين من احفادها بطريق الخطأ وبقرار خاطيء من ابنها الكبير الذي يعتبر الابن المدلل , و حتى تتدارك ذلك الخطأ امرت من ابنها ان يستقيل من العمل حتى تحميه من الاقالة والفضيحة ( يا سلام ) هذه الام الحنون اللي حتى العقاب ما عاقبت ولدها لكن احفادها عادي .

وبعد فترة من الزمن اصبحت العجوز لا تقوى على العمل بسبب العمل المتواصل وبسبب تلف شرايينها مره أخرى وتلف الامعاء والكبد والقلب يتوقف احيانا وتكون في غيوبوه لمدة يومين ثم تصحى من هذه الامراض و تواصل , وكل فترة قصيرة من الزمن يسمع الناس بالديرة ان هذه العجوز لا تستطيع العمل وان الامراض بدأت تأكلها من كل مكان ولكن يصرح ابناءها انها لا زالت بخير وان عملها مستمر !!

و آخر عملية جراحية عملت لهذه العجوز قبل يومين حيث انفجر القولون ولكن لله الحمد باقي اعضاء الجسم بخير





المسميات :

العجوز : مصفاة الشعيبة

الشرايين والاوردة : البايبات وخطوط الانتاج

القولون : الفرن الذي انفجر قبل 3 ايام في وحدة الآيزومكس وهي تنتج وقود الطائرات الحربية والمدنية

الابناء : الموظفين والمدراء


ملاحظة : هذا الكلام كتبته وانا اتحسر على اللي قاعد اشوفه بعيني من اهمال وتعسف و عدم وجود ادارة صحيحة تدير هذه المنشأة الحيوية والمهمة والتي أكل عليها الدهر وعلى كل هذا الشباب يتحمل اخطاء المسؤولين والحمدالله ان الله ستر ويرحم موتانا

43 comments:

Anonymous said...

الله المستعان واحد من الربع يقول بالكويت مثل الي ياخذ الألعاب الي متعلقة بخشب ويقعد يديرها والناس تحاسب الألعاب وتترك منو يدير الخشب!!

الحالة ماتسر العدو قبل الصديج لج الله ياكويت واذا استمرت الحاله ياما حنشوف ماقول غير الله يستر

صقر قريش

Unknown said...

Good good good......

J Daily said...

قبل ماتحط المسميات علبالي الموضوع عن الكويت
-
ترى الي نكها باد قيرل.
تحط كومنت فيه اي كلام مجرد انها تكون موجودة ولما تدخل بروفايلها تحصل سايت (:
يعني نوعاً ما دعاية

Mohammad Al-Yousifi said...

شيء مؤسف

بس شنو الحل؟

شنو لازم يصير؟

someone_q8 said...

صقر قريش

هلا بأخوي بوعبدالله

لا هذا اقل شيء ينقال بالنسبة للكويت
صار الضرب على على الخشب لما يموتونه
واللي يلعب بالخشب يكرمونه

someone_q8 said...

(^oo^) bad girl (^oo^)
than you

someone_q8 said...

يعقووبوو
هذا نموذج بسيط من اللي قاعد يصير بالكويت

someone_q8 said...

kila ma6goog
الحل بأخذ جميع المسؤولين الى دورات كيف تتعامل مع الآخرين ودورات اخذ الامور بعقلانية مو بالفهلوه
المشكلة بوسلمى ان المسؤولين امخلين الهنود على راحتهم وامخلينهم كأنهم اهم المسؤولين لانهم ما يبون اي مسؤولية ( الكويتيين ) وهذا للأسف
امخلين الكفاءات الكويتية على جانب و يعتمدون على الهنود

الحل تقليل الانتاج في مصفاة الشعيبة لانها ماخذه فوق طاقتها القصوى بـ 20 الف والطاقة القصوى هي 180 الف
شفت اشلون ؟؟
لما انحمل المصفاة فوق طاقتها لمدة 20 سنه مثلا شيء طبيعي راح يقل عمرها الافتراضي كثيييير وتبدأ المشاكل تكبر

بوسلمى الحل يبيله بوست كااامل

Q8-MaNaL said...

ليش ما يجتمعون الموظفين النشيطين في الشركة و يقدمون آراءهم حق المسؤولين بخصوص المصفاة و الحمل الزايد عليها؟

someone_q8 said...

Q8-MaNaL
للأسف اختي المسؤولين يدرون عن هالشيء ويعرفونه , لكن المشكلة فيهم اهم ما يبون هالشيء كل هذا عشان الانتاج ما ينخفض وطبعا هالشيء على ظهر البشر اللي تشتغل

Qanoonya~6moo7a said...

السلام عليكم

اللي يصير الصراحة بالكويت ما يسر كلش
مو مصدقة إنه إحنا وصلنا لي هالمستوى

الله يعينكم و الله
:(

إخوي لازم تكلمونهم مرة مرتين ثلاث
لا تيإسون
لأنه إذا سكتوا إنتوا المتضررين


يبطون جبدي اللي يقولون راح نصلح و بنسوي و الإصلاح و الإصلاح
و ماكو أفعال نشوفها بس حجي

الله يحسن الأوضاع

bo rashed said...

صبحك الله بالخير
:)
والله ياخوي انا كل هذا عندي يهون

بس سالفة ان احنا نخزن نفطنا

بكوريا علشان بالازمات نستفيد من

هالمخزون كلش ماني قادر ابلعها

البوق شلون صاير

هههههههههه
ترى العجوز الشمطاء ضحكتني
انزين مافي عجوز تسوي شعرها
بالفير
:P
مادري ليش احبك ياخوي

شقران said...

العزيز انسان كويتي

مساك الله بالخير...كيف الحال يالغالي



بالنسبة للعجوز...فمصفاة الشعيبة ماهي إلآ عجوز واحدة في دار المسنين...وما أكثر العجائز عندنا والاسقاطات لها أول وليس لها آخر


اشكرك على تسليط الضوء على قطاع من أهم قطاعات الدولة



وتحياتي لك

molok said...

اتفق تماما مع الاخ شقران ..
ماهي إلا عجوز واحدة في دار المسنين .. ياخوفي ان كل المسنين يموتون وبعدها يتيتمون كل عيالها ..

الله كريم :( وشي يضيق الخلق بصراحه

someone_q8 said...

₪ManaL₪
اختي منال فيه مثل يقول كثر الدق يفك اللحام

عيزنا واحنا انقول لهم و كل واحد يهز راسه يعني فاهم

العيب من الادارة العليا
واللي يقول اصلاح وحالته حاله قبضي من دبش من يوصل المجلس ينسى كل شيء ويتفرغ حق مصالحه
الله المستعان شكرا لتعليقك

someone_q8 said...

bo rashed
صبحك الله بالنور والنوير
احبك الذي احبني والقلوب شواهد بوراشد

لا يابوراشد مايهون , لما اتشوف اللي قاعدين احنا انشوفه يعورك قلبك لما اتشوف ان اقتصاد ديرتك قاعدين يخربونه بطريقة غير مباشرة طبعا مو عمدا لكن بالادارة الدايخه , تتحسر على اللي قاعد يصير

بالنسبة لتخزين النفط في كوريا ليلحين هذا كلام جرايد مافيه دليل مادي مثل ورقة رسمية او تصريح رسمي يؤكد هذا الكلام , وفيه اشياء ما تنقال اهنيه لكن لاتخاف ماكو الا الخير

والبوق عد وخربط صرنا ديرة اللي مايبوق يصير فيها مو كفو يعيش

Qanoonya~6moo7a said...

الله يعين

مشكلة و الله إذا ماكو ضمير و إخلاص في العمل
،،،

someone_q8 said...

شـقـــــران
مساك الله بالنور والنوير
يا هلا بالغالي اخوي شقران اشلونك شخبارك والحال يجمل الحال

نعم كلامك عين العقل و على فكرة تره فيه بعد عجوزتين عمرهم اكبر من العجوز شعيبة وحده ما شاء الله عليها تشتغل في مصفاة ميناء عبدالله ووحدة تشتغل في مصفاة الاحمدي ما شاء الله تبارك الرحمن اشحلوهم معطين كفاءة اووكي

والحين المصافي الثلاث محتررين من اختهم الجعدة الرابعة ويبون يخربون عليها عشان ما تطلع :)))
كل من بقلبه شقا الليله :)
مشكور على تعليقك القيم

someone_q8 said...

molok
هلا بالغالي
الديرة صايرة مثل العيوز كل شيء فيها قديم مستشفيات اكل عليها الدهر و بعض المباني الحكومية خلها على الله محد امخسبقنا الا البوق حسبي الله عليهم

why me said...

:(


حسافه والله


المفروض اكثر مكان يكون في صيانه

someone_q8 said...

why me
اختي تره فيه صيانه بس لي متى ؟
المعدات اللي فيها انتهى عمرها الافتراضي وتبدليهم يكلف الدولة مبالغ كبيرة واللي قاعد يصير ترقيع بترقيع

بوتشخيص said...

أعتقد لازم يكون في وقفه جادة لهذا الموضوع و يجب تسليط الضوء عليه

أشكرك على هذا الموضوع المهم

Peace said...

سوء الاداره
و سوء التخطيط


سبب العديد من المشاكل

حسام بن ضرار said...

العجوز الشمطاء جو بيبدلونها بشابه جميله بالزور، قبو عليهم نواب مجلس الخمه

فريج سعود said...

قصتك تنطبق تماما على ام هذه العجوز

someone_q8 said...

بوتشخيص
يا هلا بأخوي بوتشخيص زارتنا البركة
تدري ليش هالقطاع القليل يتكلم عنه ؟
لان عند توقيع عقد التوظيف فيه بند يقول ان اي شيء يتعلق بالشركة من معلومات اي معلومة حتى لو كانت بسيطة راح يتم انهاء هذا العقد
وهذا الشرط امخلينه عائم

لكن كثر الضغط يولد الانفجار وهذا ما حصل في السنوات الاخيرة اللي وايد من الناس تكلمت عن هالشركة

someone_q8 said...

Peace
سوء الادارة للأسف مطبق على مستوى الدولة
والشركة فرع صغير من الدولة فا شيء طبيعي تلقين سوء الادارة وعدم وجود تخطيط
شكرا لمرورك اختي

someone_q8 said...

حسام بن ضرار
تصدق عاد لما اشوف اللي قاعد يصير بين الاعضاء عشان المصفاة الرابعة اتحسر كثر شعر راسي لانهم مو حاسين ان الوضع قاعد يتدهور بشكل كبير واللي ماكلها الموظفين

الكل يبي ان تنشأ هذه المصفاة بأسرع وقت ممكن , عاد تعال فجج بالاعضاء وسوالفهم

someone_q8 said...

فريج سعود
المثل الكويتي يقول اخوي بوسعود
كل من يطلع على بذره
تخيل اتسوي عملية جراحية خطيرة حق مريض كبير بالسن فيه كل الامراض المستعصية وآخر شيء يقول الدكتور المفروض الطحال يتشال لكن نعمل ايه حنشيل البنكرياس عشان الجماعة ما بيزعلوش :)

حسام بن ضرار said...

على ما يتهاوشون عليها الا تكساكو شفرون متمدده عليها وماكلتها وماكلها فوقها جم شاليه من شاليهات المرزوق

عاد تعال فجج عقبها ودور لكم موقع ثاني ويمكن العراق وايران يعترضون على الموقع الجديد

عاد يشيلون حديقة الحيوان بالعمريه ويبنون مكانها المصفاة

اذا ما اعترض الروضان بعد

بلد قاعد يتخلف بسبة مجلس الخـ

someone_q8 said...

حسام بن ضرار
اخوي حسام الحين بالنسبة للأرض الحمدالله تمت بالخير :)))))))
وخروا عن حدود شركة شيفرون بمسافة كيلو وبمساحة اكبر من المساحة القديمة
هذا المجلس ليلحين عمره ما كمل ال اسبوعين وامسوي لوية
وبعدين عاد وين اتودي حديقة الحيوان ؟
والله لو يشيلونها ويخلون مكانها بيوت وايد ابرك , عاد تعال فجج بنقلة حديقة الحيوان ويين راح يخلونها اعتقد ان حديقة الحيوان راح يكون فيها اكثر من استجواب , بلدية - اشغال - الهيئة العامة للزراعة - الاسكان بيييييه الله يعينهم هالوزراء اذا بشيلون الحديقة :)

Anonymous said...

no comment

Unknown said...

هالمصفاة حالها حال باجي المصايب لكن كلها كروت مخشوشة اذا ما لقو شى طلعو كرت واشغلوا الناس فيه

الله يعين وعسي رمضان نصومه وتخلص مشاكلنا

someone_q8 said...

والموت يعشق فجأه مثلي..والموت مثلي لايحب الإنتظار

As you like sister :)

someone_q8 said...

Mishari
المشري المشاكل عمرها ما راح اتخلص

لكن فيه شيء اسمه عمره الافتراضي

وهالعمر وصل فوق حده
والنواب شادين حيلهم بأمور فنية ولا عارفين ان كل يوم تأخير فيه مصيبة ناطرتهم

enter-q8 said...

يا عمي اهي راده على هالعجوز
خوفك يخصخصونها نفس ما خصخصوا العجوز الثانية اختها الكويتية

someone_q8 said...

Enter-Q8

حياك الله اخوي انتر زارتنا البركة

بالنسبة للمعلومات اللي عندي وهي قريبة جدا من الصحة ان كان امفكرين انها يخصصونها وكان الاسم المتداول هو شركة الخرافي لان هالشركة ماخذه قسم كبير و مهم بالمصفاة وماخذة مقاولتها من عشر سنوات وليلحين , لكن الحين استبعد الامر وفيه تفكير جدي انه يسكربون المصفاة بعد المصفاة اليديدة ماتكون جاهزة ويخلون مكان الشعيبة مثل مركز تجميع للخزانات ومركز مزج المنتجات للمصافي ميناء عبدالله والاحمدي
والله اعلم يمكن بعد جم يوم يكون فيه تفكير ثاني خوو احنا كل ساعة لنا تفكير وقرار

صبا said...

سلام شخبارك انشالله بخير

مااااره اسلم عليك واسال من زمان عنك
يالغالي

تحياتي

مبدعة said...

السلام عليكم ورحمة الله وبركاته

اي عدل جذي السالفة تدخل العقل انا اقول اشهالعجوز اللي اعيالها امهببين فيها كل هذا
:)

الله يشافي هالعجوز ويرقعونها بعملية تجميل أخيرة بعد
:)

مدونة رائعة

someone_q8 said...

صبا
يا هلا ومرحبا والحمدالله على السلامة اختي
وعليكم السلام ورحمة الله وبركاته
مشكورة اختي على المرور مكانج موجود واتمنى لج التوفيق

someone_q8 said...

mobdi3a
وعليكم السلام ورحمة الله وبركاته
عملية ثانية بعد ؟؟؟؟
اختي اذا سوو عملية ثانية هالمره اهيه بكبرها راح تعطيج عمرها وتتسكرب نهائيا واتفجر بعيالها كلهم من حبها لهم ما تقدر اتخليهم :)
اشكرج اختي على المرور الطيب وحياج الله اخت بينا ان شاء الله

Manal said...

انا ثالث منال بهالصفحة

:)

ما اقول الا الله يسعدنا على الي عندنا

اول واخير
الضمير
الميت
الي
مودر الديرة بالي فيها من خيرات

someone_q8 said...

ManalQ8
حياكم الله كلكم خواتي وعلى عيني وراسي
اختي الضمير موجود لكن المشكلة ان في هالديرة الخير يخص والشر يعم , ودائما انشوف الشر لانه ظاهر