2007-10-04

محطات رمضانية

*** تحديث ***
تم تغيير اسم المدونه من كويتي الى انسان كويتي لان توني عرفت ان فيه مدونه آخرى اسمها كويتي وانا أعتذر لهذه المدنه اني كتبت نفس اسم عنوانها بدون قصد وشكرا

#############################################################


السلام عليكم

اليوم حبيت اتكلم عن بعض الملاحظات الموجودة في مجتمعنا مع العلم ان الذي اقوله هو عبارة عن ملاحظات لاقلية قليلة وليست لاغلبية موجودة في المجتمع



* بعض الاخوات في رمضان الله يهداهم يلبسون لبس ما يليق بهذا الشهر الكريم تلقاها لابسة ضيييق وحاطة مكياج كامل لا وبعد حاطة عطر من بعد 10 امتار تشمه ( كناية عن قوة العطر ) !!؟


* بعض الشباب في رمضان الله يهديهم عنده مزاج للأغاني ويحب ان يكون الصوت عالي في المسجل الا في نهار رمضان . يا اخي محد يمنعك ان تسمع اللي تبيه لكن مو اتطول على صوت المسجل لأعلى درجة وتفتح الدريشه !!!!


* قناة الراي من خلال ملاحظتي لها انها ما تعرف الأذان الا برمضان فقط ؟؟؟؟؟؟ ليش يعني باقي السنه ماكو شيء اسمه أذان ؟؟
عيب عليكم انتوا تتبعون لدولة اسلامية مو دول البلطيق ولا الاسكندنافية !!!!!!!!


* ايضا قناة الوطن اهون من قناة الراي لانها بوقت الاذان اتحط اعلان بدون صوت اثناء عرض اي برنامج ينبه المشاهد ان الآن حان وقت الصلاة !!!!!!!!!!! يعني ابي اعرف الأذان لما اتحطونه كامل راح يخرب على المشاهد اثناء متابعة المسلسل او البرنامج ؟؟؟؟؟


* بعض موظفي الحكومة الله يهداهم يحسسك لما اتروح واتسوي اي معاملة كأنك امقعده من النوم غصب ويايبه الدوام وتلقاه امعصب او ماله خلق يسوي شيء ؟؟ يا اخي ابتسم ما نبيك تموت من الضحك عشان تراضي الناس لكن الابتسامه صدقة وتشعر المراجع بالطمأنينة ان المعاملة راح اتخلص بيسر


* المبالغة اللي صاير بالقرقيعان شيء مو طبيعي , لازم يكون كشخة ويكون الكاكاو من نوعية غالية عشان كل واحد يشوفه يقول ان اللي يايب القرقيعان ولد نعمه ولا يعرف السنع ؟؟؟؟؟؟؟؟
بالله هذه سالفة حتى القرقيعان سويتوا فيه طبقات يا حلو قرقيعان قبل بسيط ووناسته احلى من الحين ما فيه تكلف ولا حتى مخاتاة الشكل او النوعية , والمشكلة ان قرقيعان السنوات الاخيرة صاير يكلف بالمتوسط 150 دينار هذا اذا مو اكثر بوايد وكل هذا عشان المظاهر


* بعض المسلسلات اللي تنعرض في رمضان في السنوات الاخيرة المفروض قبل ما اتشوفها تاخذ حبة للضغط والاحسن انك ماتشوفها عشان ما تستاثم بنفسك :))

* بعض العوائل ماتعرف بعضها البعض ولا يزرون بعض الا برمضان والعيد وبعدين كل واحد يشوف شغله وطااااف

هذه بعض الملاحظات على بعض المظاهر الموجودة في مجتمعنا وهي اقلية جدا لان البلد فيه الناس اللي فيها الخير واللي تتحمل مسؤولياتها على اكمل وجه , يمكن طريقة كتابتي متشائمه لكن اعتقد اني اقول البعض وليس الكل وان شاء الله يهدي هؤلاء الأقلية الى الخير والطريق الصحيح

وهذه استراحة للابتسامة اللي نسيناها من مسرحياتنا الاخيرة الدايخه






ولكم مني كل تحية واحترام

12 comments:

بعثرة مشاعر said...

مثل ماقلت
البعض وليس الكل
صدقت في كل نقطع
عسا الله يهديهم و يهدي المسلمين جميعا

جزاك الله خير

Aldenya said...

كلامك كله

عدل


من قرقيعان اللى صار مثل دور الأزياء
لازم الككاو غالي " وأنا معاهم عشان أمتع معدتى منه :> " ولازم يكون شكله ازقرت
وحجمة
لازم كبير
مادري اشفيهم الناس
حتى بالقرقيعان غيروا مفاهيمه


والموظفين
لازم نفسية برمضان !!
طبعا البعض مو الكل
بس شدعوة هالنفسية :/

والمكياج
انا ما يبط جبدى إلا إذا تذكرت
وحدة الله يستر عليها
حاطه شدو " المكياج اللى على الجفن "
أسود وفوق سلفر لماع
وبودره وررررررردية فاقعة
والكريم الأساس طحين
ومن دون حمره !!
يزاها الله خير
عشان ما تاكل الحمره ويبطل صيامها !!

" وايد عليها "

والاشياء الثانية اللى حطيتها لنا بالبوست
كله كلام واقعي
لكن نسيت
ان في فئة من الناس
أشكره تجاهر بالإفطار بنهار رمضان
يا واحد يدخن
والثانية تعلج
يعني غصب يخلونك تدري انهم فاطرين !!
ما يصير :/

سلبيات أتمنى انها تزول بهالشهر الفضيل

وقواك الله

kila ma6goog said...

150؟؟

خبرك عتيج

someone_q8 said...

بعثرة مشاعر

دائما الخير يخص والشر يعم
وهذه الاقلية اهيه اللي امخلية نظرة
الناس كأنها اغلبية لانها ظاهرة
بارك الله فيج
ـــــــــــــــــــــــــــــــــــ

Aldenya

مشكورة اختي على كلامج , وبالنسبة للي يجاهرون برمضان الله يهديهم لانهم جاهلين مو حاسين باللي قاعدين يسوونه ولو يدرون عدل انهم بهالشيء يغضبون الله ورسوله جان صار كلام ثاني وما اقول الا الله يهديهم
ـــــــــــــــــــــــــــــــــــ

kila ma6goog
ادري انه يوصل لي 900 دينار في بعض الاحيان لكن انا حطيت 150 قلت يمكن فيه ناس يصرفون اقل من هالمبلغ ومشكور على التعليق

Selezya said...

صح لسانك صاج والله

انا وياك اللي باط جبدي سالفة هالقرقيعان والله انا من عمري ماعرفت اللي قاعد يصير والحمدلله ان هالشي ما عجبني لان الامهات بكبرهم عجبهم وقامو يلعبون بهالقرقيعان
والله احنا يبنا قرقيعان من البقاله وقمنا نوزع لا وعلى بجاماتنا ما لبسنا هالخرابيط لول صج ان الوحيدين اللي جذي بس مو لهدرجه اسراف وخبال

والبنات والشباب الله يهديهم انشالله

مم مو من متابعين الوطن او الراي ولا حتى المسلسلات .. ما اتحمل شي منهم


ويعطيك العافيه عساك عالقوه :)

بوصالح said...

ملاحطات قيمة

محاولة إيجاد الحلول .. ستكون رائعة

kuwaitya_7saweya said...

وعليكم السلام

اذا على اللبس و الاغاني تهووووون
والله يهديهم

اي هم انا لاحظت قناة الراي مايحطون اذان الا برمضان
والوطن مو متعبين نفسهم

اما بالنسبه للموظفين جنه بس اهم اللي صايمين واحنا لأ

اما المسلسلات حدث ولا حرج

وعساك من عواده
وكل عام وانته بخير

someone_q8 said...

Selezya حياج الله اختي
ونتمنى للجميع الهداية واولهم انا :))

###################################

بوصالح
كلامك عدل ان شاءالله راح انحاول ايجاد الحلول مشكور اخوي على هالفكرة

#################################
kuwaitya_7saweya
اذا كانت الكلمة وحده من الجميع ويقولون للخطأ لأ اعتقد راح تكون هالوقفة لها تأثير كبير
مشكورة على تعليقج

Mishari said...

من افضل الملاحظات
القرقيعان انا شلت ايدي منه ومالى شغل فيهم كيفم قرقعوا والا قعدوا
غير مو بو 5 دنانير ماكو

:)

والاذان استغفر الله راح نشوف يوم يختفي من التلفزيون شكله

وانا ما اروح اخلص معاملات برمضان افك نفسي

المكياج واللبس الله يصلح حال المسلمين
والله شئ مخجل

someone_q8 said...

Mishari
تدري شنو مشكلتنا اخوي ؟
مشكلتنا الصمت !!!!
تشوف الغلط واتسوي روحك كأنك ماتشوفه
واذا تكلمت بطريقة صحيحة صرت انسان رجعي و مو متحضر
ما اقول الا الله يهدي الجميع
مشكور على تعليقك

Selezya said...

تقبل الله صيامك وبلغك ليلة القدر ان شاء الله
وكل عام وانت بخير وعيدك مبارك مقدما

someone_q8 said...

Selezya
منا ومنك اختي صالح الاعمال وعساج من العايدين والفايزين
مشكورة على هالتعليق الطيب