اعتقد ان اللي شفناه وقريناه وضح حجم المشكلة اللي نعاني منها بالارقام
*** رسالة الى اللي يفكر بالطلاق خصوصا اذا كان بينكم عيال ***
قبل لا اتفكر بالطلاق فكرت بعيالك ؟
فكرت بمصيرهم التعليمي ؟
فكرت ان عيالك راح ينحرمون من الحماية والقوة ؟
فكرت ان لحظة غضب راح اتدمر كيان اسرة ؟
فكرت وفكرتي ان الانسان اللي جدامك مو كامل , كل واحد فيه عيوب ومحاسن ؟
فكرت ان اهيه متحملة طباعك الشينة وانت متحمل عيوبها , وكل واحد راضي بقسمة ربه ؟
فكرت بطريقة تربيتهم وهم بعيدين عنك ؟
فكرتي انج وقت تحرمين الابو من شوفتة عياله وفقط يشوفهم ساعتين بالاسبوع راح اتشوفينه لما تكبرين بعيالج ؟
فكرتي بالعشرة اللي بينكم وان اغلب الخلافات اتصير على شيء ما يسوى؟
*** رسالة الى كل رجل ***
مو من الرجولة انك اتطق ( تضرب ) امرأة ضرب مبرح
مو من الرجولة انك تاخذ كرت البنك الخاص للزوجة وتقعد تصرف معاشها على كيفك
مو من الرجولة انك ماتصرف على زوجتك وبيتك وعيالك وقاعد لي بالقهاوي وطالع مع ربعك وامخلي زوجتك تصرف على بيتك
مو من الرجولة انك اتعصب على اتفه الاسباب
مو من الرجولة انك اتخون زوجتك مع وحده ماتسوى عشان والله ان زوجتك اهملتك اشوية وجابلت عيالك
*** رسالة الى المرأة ***
مو حلوة لما يشوفج ريلج بشكل امهتمل وكلة عاقدة النونه
مو حلوة لما اتطولين السانج على زوجج والكل يسمع شنو اللي قاعد يصير لان طولة اللسان اتثير الرجل
مو حلوة لما يطلب منج زوجج طلب بسيط مثل اتسويله شاي ولا اتييبين له ماي اتحسين انج خدامة وتتكاسلين عن اجابة الطلب
مو حلوة لما ايي الريال من دوامه تعبان تقعدين اتحنين عليه بالطلبات
مو حلوه كل ساعة او اي مناسبة لازم زوجج اييبلج هدية مااركة
مو حلوة اتعصبين على اي شيء و على طول شايلة اغراضج ورايحة بيت اهلج
*** آخر الكلام ***
خل انحط ببالنا ان الزواج نعمة من الله وان هالزواج ميثاق غليظ جدا مو بهالسهولة يقطع هذا الميثاق
خل انحط ببالنا ان الزواج الفه بين الزوجين مو صراع دائم
خل انحط ببالنا ان مافيه احد كامل
خل انحط ببالنا ان الزواج نقدر انخليه جنه او انخليه جحيم بإيدنا
خل انحط ببالنا ان هالحياة الزوجية لها الخصوصية الكاملة وعدم تمكين احد من الخارج التدخل في هذه الحياة
*******************************
ادري قسيت بكلامي على اخواني واخواتي لكن الدنيا اخذ وعطى وخير الامور اوسطها
لا انكبر الخلاف على شيء تافه ومايسوى
اذا صار خلاف بينكم وهدت الامور بينكم
خل كل واحد يقعد بروحه ويكتب عن الثاني ايجابياته وسلبياته بضمير وبعقل
صدقوني راح انشوف ان السلبيات اقل من الايجابيات
اتمنى لكل الازواج دوام السعادة بينهم والله يتمم عليهم بكل خير
وهذا رابط التقرير الكامل لإدارة الاستشارات الاسرية لسنة 2008
اشوفكم على خير ان شاء الله
ولكم مني كل تحية واحترام
