الغلاء

يوجد تحديث بسيط وتنويه بالاسفل

السلام عليكم ورحمة الله وبركاته

بعيدا عن الانتخابات و سخونتها , اليوم راح نتكلم عن سخونة الغلاء ونار الاسعار اللي صايرة شيء مو طبيعي بالبلد , شاللي صاير بالديرة ؟ التاجر صاير مو بس طماع صاير انسان مايخاف الله من خلال زيادة الاسعار بشكل مقزز !

الناس تتكلم عن ارتفاع الاسعار في الجمعيات في اغلب الاحاديث , لكن المشكلة مو بس بالجمعيات المشكلة في كل شيء ! مواد تموينية - مواد بناء - قطع غيار السيارة - المستشفيات الخاصة ( على شنو مادري ) - المواد الغذائية بجميع انواعها حتى القهوة التركية زادت :)

والله الواحد يتحسف على زيادة المعاش وكله بسبة زيادة الاسعار , ليش صرنا جذيه ايام قبل ابهاتنا علومنا ان التجار كانوا يساعدون الحكومة في دعم الاقتصاد ودعم الحكومة وهذا بعد قريناه في الكتب , الحين التجار صاروا ياكلون معاش المواطن اللي من اتييله زيادة ولو بالغلط زادوا التجار اسعار السلع ؟

طبعا راح اتقولون ان هالزيادة عالمية بسبب زيادة اسعار البترول !

وانا وياكم نعم بس مو لي هالدرجة

صرنا نشتري ماجلة البيت والاغراض من الخفجي ولا من حفر الباطن ولا من الخبر !!!!!!!!!!!!!!!!!! الله يرضى بهالشيء ؟

هذه حالة الكويتي , قام يشتري اغراضه الاساسية من بره الكويت ؟؟؟؟؟؟؟؟؟

من متى قمنا نشتري اغراضنا من بره ؟؟؟؟؟؟

وبعدين انا بعرف زيادة الاسعار العالمية ماتصير الا بالكويت ؟؟؟؟

يعني هالكلام ما ينطبق على السعودية مثلا ؟؟؟؟؟؟

اهناك الاسعار وايد رخيصة وبنفس الماركات والسلع !!!

ولنأخذ شركة كي دي دي كمثال على هالحالة :

الشركة زادت الاسعار في الكويت لكن بالسعودية راح تلقون سلعها ارخص من الكويت , ليش ؟؟؟؟؟

الشركة امأجرة الارض من الحكومة بسعر رمزي

العلف اللي تشتريه ايضا مدعوم من الحكومة

المكائن والآلات اللي عندها شاريتها من زمان يعني مو توه عشان اتزيد اسعارها

بقولكم سالفة ضيقت خلقي وعشان اتعرفون جشع التجار اشلون صاير :

من مصدر موثووووق : اجتمع وفد من غرفة وتجارة الكويت مع وزير التجارة الحالي . وكان هذا الوفد مكون من رئيس غرفة التجارة , ونائبه المحترم , وكان معاهم ملف الزيادة اللي يبون الوزير يوافق وكان الوزير يحاول يتمادى في طلبهم و يأخره تدرون ليش يا جماعة الخير لان الزيادة كانت على جميع المواد هي 200% فقط

لكن الوزير قالهم طبعا راح اشاور الجماعة اللي فوق , فطلع الوفد امعصب لانه ما عطاهم كلمة او وقع على موافقة طلبهم

عرفتوا شنو مشكلتنا : ماكوا قرار حازم من الوزير يقول لآ او نعم لازم كل ساعة يشاور الجماعة

طبعا صار كلام بينه وبينهم اكثر من هالشيء لكن حفاظا على سمعة تجار الكويت ما راح اقوله

يعني انا بعرف زيادة الاسعار ما تنزاد الا لما يسمعون التجار ان هناك زيادة للمواطنين ولا ان هناك فيه جهة اقروا لها كادر ؟؟؟

عسى ما زادوا جهة شفنا الاسعار زادت ؟ ولما عرفوا التجار ان هناك زيادة وحده لكل المواطنين وهي ال 120 وهي نهائية زودوا الاسعار بشكل نهائي , والله حرام اللي قاعد يصير بهالشعب , يعني الزيادة اتيي من صوب واتروح حق التجار من صوب , ما سوينا شيء على قولة المثل الكويتي صبه حقنا لبن :)

ملاحظة هامة : كلامي هذا حق التجار اللي مايخافون الله في ديرتهم مو حق التجار الي ما زادوا على المواطنين اي زيادة وهم معروفين كثر الله من امثالهم , و طبعا كلامي ليس عام على كل التجار بس خااااص على كل واحد زاد اسعاره

ما اقول الا اخيييييييه عليج ياكويت كل من يتغنى فيج و من ظهرج يطعنج بإسم الديموقراطية , لكن ما راح نسكت ان شاء الله

ولكم مني كل تحية واحترام

التنويه والتحديث في نفس الوقت :

المقصد من هذا الموضوع مو بس المواد الغذائية والمستلزمات الاساسية في الجمعيات فقط , انما انا اقصد بشكل عام الزيادة في ابسط الاشياء يعني المستشفيات الخاصة زادت اسعارها مع زيادة المواطنين , مواد البناء من طابوق واسمنت وحديد و تمديدات , ايضا الايجارات واسعار البيوت بالنسبه للسكن سواء بيوت او الشقق صارت شيء مو طبيعي , ما انسى دور اتحاد الجمعيات الفاشل في ردع زيادة الاسعار .

فا يا ريت ان ما انركز فقط على الجمعيات في الموضوع , واشكر كل من علق ونبهني الى هذه النقطة ولكم مني كل محبه وتقدير